Delles organizaciones convoquen una manifestación en La Felguera pol futuru de la minería

Los sindicatos CSI y SUATEA y les organizaciones polítiques Andecha Astur y PCPE convoquen pa güei martes pela tarde en La Felguera una manifestación al favor del futuru de la minería y a la contra del prealcuerdu actual ente Gobiernu y sindicatos mayoritarios nel que se defende'l pieslle de 6 pozos de carbón n'Asturies.

La marcha, que va salir a les 7 de la tarde del parque Duro de La Felguera, reclama que'l carbón asturianu tenga calter de reserva estratéxica y pide que se caltengan abiertes les mines asturianes como defensa pa en casu d'una hipotética crisis enerxética y que s'empobine la producción asturiana de carbón al consumu de la siderurxa por tener esti consumu precios más altos que'l carbón térmicu. La manifestación, que critica que se tranquen más pozos n'Asturies que en Lleón y denuncia que'l plan beneficia los intereses particulares del empreariu lleonés Victorino Alonso, quier ser tamién una crítica a l'actuación de los sindicatos mayoritarios na so xestión de la crisis de la minería, acusándolos de defender el pieslle de los más de los pozos y la desapaición de miles de puestos de trabayu ensin que se dieren a cambéu d'ello unes contrapartíes afayadices en materia de creación d'emplegu.

Los convocantes centren la so propuesta en que nun se dean más pielles de pozos nin mengües de producción, y en que les prexubilaciones se dean dende los 52 años pero que les places se renueven con xente mozo de les cuenques, amás d'un futuru pa la minería más p'allá del 2012.