L’Archivu de la Música Tradicional prepara’l “Cancioneru secretu d’Asturies”

Más d'ochocientes cuartetes de lletra anticlerical y conteníu sexual igüen el "Cancioneru secretu d'Asturies" una obra que dieron a imprenta los investigadores del Archivu de la Música Tradicional asturiana y l'Archivu d la Tradición Oral d'Asturies, dambos dependientes del Muséu del Pueblu d'Asturies. Jesús Suárez López y Fernando Ornosa son los responsables directos d'esti llibru, que se fexo tamién cola collaboración del especialista madrileñu José Manuel Pedrosa, profesor de Teoría de la Lliteratura y Lliteratura Comparao de la Universidá de Alcalá.

La obra, que ta p'asoleyase d'equí a pocos díes, va recoyer los cantares y coples de la tradición oral asturiana que nunca nun apaecieron en cancioneros nin trabayos compilatorios anteriores pola temática de les sos lletres, que lo mesmo echen pel clero que falen de cuestiones sexuales y adulteriu con vocabulariu esplícitu o faen comparaciones ente persones y animales. La investigación centróse nos temes más tradicionales, dexando de llau coples de temátiques más contemporanees como pudieren ser les antimonárquiques, por poner un casu, anque de cualquier manera los investigadores que llevaron alantre esti trabayu sorrayen la dificultá que tuvieron pa consiguir de los informantes, xente mayor de tola xeografía asturiana, unes coples y cantares que da apuru diciles nin cantales nun siendo en presencia de persones de confianza.