Tolos partíos piesllen la campaña

Darréu de l'anuncia del candidatu del PP Mariano Rajoy de pesllar por anticipao la campaña electoral en señal de duelu pol atentáu d'esta mañana, tolos partíos políticos d'ámbetu estatal y asturianos decidieron pesllar la campaña electoral. PSOE, Izquierda Xunida-Bloque por Asturies, Andecha Astur y Izquierda Asturiana tamién retiraron esta mañana tola propaganda en medios de comunicación y dieron anuncia de que daben por trancada la campaña.

El candidatu d'IX-BPA Jesús Iglesias esplicó na "rueda de prensa más triste de mio vida" que quería tresmitir "la solidaridá ensin reserves d'IX-BA coles víctimes, colos mozos, obreros y estudiantes que morrieron o que tan mancaos" finando la rueda de prensa con un llamáu a participar nes manifestaciones pertinentes que se faigan. Pela so parte, Andecha Astur, que tamién trancó la campaña, esplicó en comunicáu de prensa la so solidaridá coles víctimes y dixo en referencia a ETA que "les vides de tolos inocentes muertos y mutilaos nun valen menos que cualisquier oxetivu emancipatoriu". La campaña acabó tamién pa Izquierda Asturiana, que fizo un comunicáu llamando a la calma y a la reflexón sobre la masacre y afalando a los asturianos solidarizase coles víctimes y a dir a votar el domingu en demostración de madurez democrática.

Les instituciones asturianes tamién s'amestaron al sentir común. El Presidente Areces decretó tres díes de lutu y llamó a los asturianos a manifestase mañana n'Uviéu en defensa de la democracia, la Constitución y p'acabar col terrorismu, siguiendo la llinia propuesta dende'l Gobiernu Central. La Xunta Xeneral del Principáu dixo nun comunicáu oficial que "rechaza'l terrorismu indiscrimináu" y pide a les instituciones, fuerces polítiques y ciudadanos "caltenerr la xunidá y calma pa defender la democracia, la paz, la vida y la llibertá. La delegada del Gobiernu, Mercedes Fernández dixo pela so parte que "la democracia decidenla tolos ciudadanos y non dellos cos con estos actos terroristes".

Fuera del ámbetu políticu, que foi'l primeru en reaccionar, sindicatos, organizaciones empresariales, culturales y sociales de toa triba lleven tola mañana unviando comunicaos de refuga al atentáu y de pésame. Asina, el sindicatu agrariu COAG-Asturies espresaba'l rechazu de los homes y les muyeres del campu asturianu al terrorismu. Les Cámares de Comerciu de Xixón, Uviéu y Avilés y la Federación d'Empresarios tamién ficieron otru tanto y llamaron a la participación nes concentraciones de refuga.