Conciertu solidariu en Mieres con Banda Bassotti

Participen tamién Misiva, La Tarrancha y los madrilanos San Blas Posse.

Mieres en Llucha, Asturies en Pie y Darréu entamen esti eventu, que nun se queda namái no musical. A les 19 hores ta previsto un pasucais escontra la nomada ‘Llei Mordaza’ y les reformes del Códigu Penal, con salida de la ilesia de San Xuan. Mentes, a les 20.15 hores van celebrase nel Colexu Públicu Liceo-Aniceto delles intervenciones, entes les que destaquen la d’Elena Ortega, madre d’Alfonso Fernández Ortega ‘Alfon’, condenáu a cuatro años de cárcel tres ser acusáu de llevar na mochila un artefactu esplosivu mientres la fuelga xeneral del 14-P, y Lola Onieva, de Madres contra la Represión.

A les 21 hores ta previsto que comiencen les actuaciones musicales, que tienen como cabeza de cartelu a los italianos Banda Bassotti. Xunto a ellos van actuar dos bandes asturianes qu’empleguen l’asturianu, Misiva y La Tarrancha, y San Blas Posse, coleutivu musical madrilanu.

L’oxetivu d’esti eventu, de nome ‘Ensin mordaces’, ye recaudar fondos p’afrontar tolos procesos represivos que se tán viviendo anguaño n’Asturies, como l'abiertu contra los 5 de Zarréu, y el pagu de multes.