La Seronda n’Avilés trai a la villa música, baille y productos de temporada

Del xueves al domingu celébrase la XIII Seronda n’Avilés, actividá dedicada a la cultura asturiana y a los productos de temporada. La plaza Domingo Álvarez Acebal va acoyer dende’l vienres la carpa onde va desendolcase tola actividá.

P’abrir boca, esta tarde,  a les 19.30 hores, Fonsu Fernández, direutor del Muséu de la Gaita, va dar la conferencia ‘Contautos ente música popular y culta nel repertoriu de la gaita asturiana’ nel Palaciu de Valdecarzana. Mentes, l’apertura de la carpa va facese mañana, a les 18 hores, momentu nel que los visitantes van poder disfrutar nel llugar de música popular, animación, puestos con productos serondiegos, como tortos, sidra, castañes o mazanes, una esposición sobre xuegos tradicionales y un chigre onde poder consumir bébores.

La programación entamada pola Federación Xuntanza y el Conceyu d’Avilés va comenzar a les 19 hores con una actividá dedicada a la sidra y les castañes, pa depués continuar cola actuación d’una bandina tradicional, una esfoyaza popular y les actuaciones de les pandereteres Serenden –acompañaes d’una amuesa de bailles tradicionales– y del grupu folclóricu Filandón. Yá a les 22 hores va entamar la ‘Nueche en Danza’, cola participación de le Pandereteres d’Escontra’l Raigañu y Cantaruxare, pa depués dexar l’escenariu abiertu hasta la medianueche.

Conciertu de Tejedor

L’apertura de la carpa’l sábadu ta prevista pa les 12.30 hores. Una hora más, los Amigos de Xixón van encargase d’animar l’ambiente con tonada entantes de la comida popular. Ésta ta prevista pa les 14.30 hores, con un menú compuestu por pote de berces y arroz con lleche.

Los neños y neñes van poder disfrutar pela tarde, dende les 17.30 hores, de l’actividá ‘La seronda: tiempu de calabaces, castañes...y folixa’, a cargu de Tres Colores, siendo’l turnu pa la música a les 19.30 hores. En primer llugar van tomar l’escenariu los bailles y dances de Xaréu d’Ochobre, pa depués dexar pasu a Héctor Braga con ‘Canciones na tradición’. Por último, a les 22.30 hores, Tejedor va ufrir un conciertu, de xuru especial al tocar en casa.

La xornada cabera, el domingu, va haber actividá na carpa dende les 12 a les 14.30 hores, momentu últimu pa mercar los productos serondiegos nos puestos instalaos nel llugar y de disfrutar de los xuegos populares.