Landa y Rodríguez dexen el so escañu cuatro meses depués de les eleiciones

Los parllamentarios de Foro esponen motivos profesionales p’abandonar el cargu. Los sos puestos van ser cubiertos por Isidro Martínez Oblanca y Pedro Leal, de manera respeutiva.

Poco más de cuatro meses depués de les Nacionales, onde Foro algamó trés escaños, dos de los diputaos de la formación que tien a Cristina Coto como cabezalera deciden abandonar el cargu. Trátase d’Esther Landa y Argimiro Rodríguez Guerra, qu’ayeri dieron una rueda de prensa –na que tamién participó Coto– cola intención d’evitar “interpretaciones que pudieren ser errónees”, espresó Landa, diputada por Foro nes dos llexislatures anteriores.

“Les razones poles que decidí arenunciar al acta son esclusivamente profesionales. Diéronse recién una serie de circunstancies profesionales que faen qu’ésti sía xusto’l momentu de reincorporame a la empresa onde yo trabayaba hasta’l 2011 y cola que dende esi momentu toi en situación d’escedencia forzosa”, esplicó. Mentes, Rodríguez Guerra, que fora viceconseyeru d’Educación y Formación Profesional mientres el Gobiernu de Francisco Álvarez-Cascos y candidatu de Foro a les Europees, apuntó que “el volume de trabayu ye enorme y yo quiero facer les coses bien; ye ún de los mios principios na vida, siempre la escelencia, y si nun la puedo consiguir creo que nun debo continuar”.

Coto, pela so parte, afirmó que “yo creo nos equipos, nun creo nes individualidaes y afortunadamente en Foro hai equipu, hai cantera, y a partir de güei –por ayeri– entrarán con normalidá absoluta otres persones, remodelándose’l grupu con un oxetivu al que nun voi a renunciar n’absolutu, y ye a desendolcar un llabor de trabayu como si fóramos doce, igual que la llexislatura pasada, y eso lleva un esfuerciu considerable. Probablemente la xente nun tea acostumada a ver a los políticos volver a la so actividá profesional, pero en Foro lo vemos con total naturalidá y tranquilidá”.

Regresu de Martínez Oblanca

Los escaños de Landa y Rodríguez Guerra van ocupalos los siguientes na llista de Foro, esto ye Martínez Oblanca y Leal. El primeru torna asina a la Xunta Xeneral tres dexar el vienres el so cargu de senador en representación del Parllamentu asturianu pola incorporación de María Luisa Carcedo (PSOE) y Fernando Goñi (PP) nel aniciu d’esta llexislatura. Mentes, Leal ye’l responsable de Política Municipal de la formación.

Na semeya, Landa, Coto y Rodríguez Guerra.