La Fundación Belenos edita un llibru sobre los llavaderos de Piloña

Va presentase esti sábadu en L’Infiestu cola presencia del so autor, Daniel Cueli. Pertenez a la coleición ‘Cartafueyos de Belenos’.

‘Los llavaderos del Conceyu Piloña’ ye’l nome d’esta obra resultáu de trés años de trabayu. Nella, l’etnógrafu de Coya, miembru de la Fundación Belenos y del conseyu editorial de la so escelente revista ‘Asturies, memoria encesa d’un país’, apurre un censu de tolos llavaderos esistentes en terrén piloñés, amás d’otros munchos datos significativos.

Compuestu por 72 páxines nes que s’inclúin 84 semeyes a color, Cueli divide esti trabayu en cuatro partes. La primera ye un entamu nel qu’esplica les razones que lu llevaron a facer esti estudiu, pa depués continuar con unes notes nes que se traten estensamente delles cuestiones al rodiu los llavaderos de Piloña, como ye la cronoloxía, la  tipoloxía o los elementos arreyaos. El censu vien darréu, pa finar con dellos apéndices empobinaos a tratar dalgunes cuestiones d’una forma más específica.

La presentación pública de ‘Los llavaderos del Conceyu Piloña’ –númberu 9 de la coleición ‘Cartafueyos de Belenos’–, que tamién contó cola participación d’Ástur Paredes na coordinación editorial, el diseñu y la maquetación, va celebrase mañana a partir de les 12.30 hores nel llavaderu públicu de Los Caños, nel barriu de Triana de L’Infiestu. Tres l’actu va poder mercase’l llibru, que tamién va tar disponible nes llibreríes Rima y Jambrina (L’Infiestu), La Escolar (Nava), Cervantes y Ojanguren (Uviéu) y Paradiso (Xixón). El so preciu ye de 15 euros.

Na semeya, el llavaderu de L'Infiestu.