El polémicu telegrama del Conseyu a la Sociedá de Naciones

El mayor enfadu del gobiernu de la República llegó cuando’l Conseyu se dirixó a la Sociedá de Naciones al traviés d’un telegrama, potestá que namás-y correspondía a los estaos soberanos, y que provocó un incidente diplomáticu al entender l'organismu internacional que se taba amenazando cola posibilidá d'execuciones de los presos.

Esti telegrama a la Sociedá de Naciones, l’antecedente de la ONU, foi’l principal motivu de resquiebra ente’l Conseyu Soberanu y el gobiernu de la República. El Ministru de la Gobernación-y tresmitió a Belarmino Tomás la so “sorpresa y disgustu”.
 
Na comunicación del gobiernu asturianu a la Sociedá de Naciones, datada’l 12 d’ochobre de 1937, mes y mediu depués de que’l Conseyu Interprovincial proclamara la so soberanía, Belarmino Tomás escribía: “aviación fascista asesina diariamente cientos de neños y muyeres, destruyendo pueblos enteros cola so metralla, mundu civilizáu debe intervenir cese tantu crime, casu contrariu nun respuendo pueda pasar cinco mil prisioneros tenemos cárceles Asturies tovía, cuando faigo tolo posible ye difícil contener pueblu”.