As Xornadas Culturlingua abren el Festival Intercéltico d’Occidente

Dende esti martes y hasta’l llunes celebráse en Tapia’l XIX Festival Intercéltico d’Occidente (FIDO), que presenta delles actividades culturales paraleles a la programación musical.

Ensin Noite Máxica –que tornará l’añu qu’entra na ventésima edición– y l’Arribada nocherniega del vienres, el FIDO presenta un cartelu mui variáu nel que destaca la participación de bandes de gaites procedentes de Breizh y Galicia, y grupos d’Éire y Euskadi, amás de formaciones asturianes. La inauguración del mesmu ta prevista pa mañana a les 19 hores col izáu de la bandera celta, anque l’actividá entama güei con As Xornadas Culturilingua, dedicáes al idioma llariegu.

A les 20.30 hores, na Casa da Cultura, van presentase dos llibros. El primeru ye ‘As tres xarolas’, cuentu escritu por Inés Fernández Fernández, al que va siguir ‘Parzamique en Brañavara/Conversación en Brañavara’, obra d’Alfredo González Fernández ‘Fredo de Carbexe’. A esta actividá dedicada al gallego-asturiano hai que sumar una esposición de llibros en fala que va tar abierta na Biblioteca de Tapia de 19 a 20 hores dende mañana hasta’l vienres; la charra ‘Os nomes dos nosos lugares’, a cargu de Miguel Rodríguez Monteavaro, que va celebrase na Casa da Cultura mañana a les 20.30 hores.

Mercáu Celta

Un poco entantes, a les 19.15 hores, va inaugurase’l Mercáu Celta instaláu nes places de la Constitución y Campogrande, que va tener hasta’l domingu un horariu habitual de 11 a 22 hores. A les 20 hores ta prevista l’animación de la Banda de Gaitas Marino Tapiega, pa zarrar la xornada, a les 21.15 hores, cola actuación del acordionista Blanco.

David Varela va impartir al meudía del xueves na Casa da Cultura una cursu d’instrumentos tradicionales asturianos, mentes qu’a a les 12.30 hores nel Instituto Marqués de Casariego de Tapia inaugurase l’amuesa ‘Galicia na música’, a cargu del coleutivu vigués Artesanía Os Alegres, fundáu nel 1939 y que dende’l 1974 se dedica a la restauración y fabricación d’instrumentos antiguos. Ésta va poder visitase hasta’l sábadu n’horariu de 11.30 a 13.30 y de 19 a 20.30 hores.

Les actuaciones del día va abriles la bandina Ayalga a les 13.30 na plaza del Ayuntamientu, mentes que pela nueche, a les 23.30 hores, va dar un conciertu una de les formaciones fieles al FIDO añu a añu: El Koku la Manzana. Ésti va tener llugar nel puertu.

Les bandes de gaites de fuera del país lleguen el vienres, siendo la primera en desfilar la bretona Bagad Bro An Aberioù, que va facelo xunto cola asturiana Banda Gaites Camín de Fierro pel puertu y l’Ayuntamientu a les 13 hores. Pela tarde va haber actividaes pa neños y una clase maxistral de violín a cargu de la irlandesa Leslie Jordan, del grupu Sheela Na Gig, que va participar na Noite Folk de la playa del Murallón xunto col vascu Iñaki Plaza. Va ser a partir de les 23.30 hores.

Presentación de ‘El Batallón Galicia’

Al meudía del sábadu va celebrase l’homenaxe a los marineros el mirador d’Os Cañóis y, media hora depués, el periodista Cristóbal Ruitiña va presentar la so novela en gallego-asturiano ‘El Batallón Galicia’ nel propiu puertu. Pa les 13 hores ta entamada un taller de danza asturiana na plaza del Ayuntamientu a cargu de Trebeyu, a la que va siguir una actuación peles cais de la villa de la banda gaites gallega Airiños de Fene.

Yá de tarde, a les 19.30 hores, ta prevista la presentación na Casa da Cultura del llibru ‘Ornamentación na gaita asturiana’, obra de Balbino Menéndez Suárez, direutor de la Banda Gaies Camín de Fierro. Tres la mesma, alredor de les 20.15 hores, va celebrase una clase maxistral d’instrumentes celtes a cargu de la Orquesta Céltica Asturiana, que va participar nel primer Murallón Folk (23.30 hores) xunto con Airños de Fene. Enantes, a les 20.30 hores, va actuar Bagad Bro An Aberioù na plaza del Ayuntamientu.

La xornada del domingu va principiar a les 11.30 hores cola ‘Alborada del mar’ y la misa folclórica, a la que va siguir, a les 13.45 hores, la recepción municipal a les formaciones participantes, qu’animarán les cais de la villa darréu. A les 19.30 hores el gaiteru Rigu Suárez va dar una clase maxistral de gaita midi na Casa da Cultura y, a les 20 hores nel Auditorio de Tapia, Andrés Penabad va facer lo propio sobre l’acordión.

Precisamenta Penabad va protagonizar, a les 22.30 hores, el segundu Murallón Folk xunto col grupu folk rioseyanu SEU. Ésta va ser l’actividá cabera del FIDO, que’l domingu va arriar la bandera celta pensando yá na edición próxima, que va ser especial por cumplir el certame venti años de vida.