¿Ye la campaña 'Aquí Patria Querida' una falta de respetu a Asturies?

La campaña de Llotería de Navidá de 2015 emplega’l ‘Asturies, patria querida’, camudando la so lletra - L'usu publicitariu del himnu oficial xenera polémica

L’anunciu, enfocáu pa la radio, camuda’l testu del himnu oficial del país por un ‘Aquí, patria querida’ dientro d’una campaña multiplataforma que tien nel anunciu pa televisión el so puntu fuerte. Ésti consiste nel cambiu de nome a cinco poblaciones pol de ‘Aquí’, faciendo referencia a que’l Gordu de Navidá pue tar en cualquier llau: Graus y Benasque (Aragón), Madrilejos y Tembleque (Castilla), y El Vendrell (Catalunya).

Con un soníu de gaita de fondu y asemeyando a una grabación vieya, l’anunciu d’audio camuda na lletra del hinmu ‘Asturies’ por ‘aquí’, siguiendo la mesma idea publicitaria, nuna utilización, polo menos duldosa, del himnu oficial d'una comunidá autónoma, que sedría impensable colos himnos d'otros países o comunidaes.

Nes redes sociales hai división d'opiniones ente les persones que consideren que l'usu publicitariu del himnu oficial d'Asturies y la so modificación ye una falta de respetu que tien de rectificase, y la xente que ve un bon anunciu ensin más, na propuesta de la ONLAE d'esti añu.

Himnu oficial asturianu

Asturies, Patria querida ye l'himnu oficial del Principáu d'Asturies, según establez la Llei 1/1984 de 27 de abril. Yera un cantar perpopular que s'emplegaba nos actos políticos, sociales y culturales de la época de la transición, que s'identificaba en dellos entornos antifranquistes como un tema reivindicativu, y que tenía un fondu raigañu y conocencia na sociedá asturiana.

De toles maneres la so proclamación como himnu oficial nun escapó a la polémica, al ser un cantar que, especialmente durante la dictadura, promovióse como una melodía folixera, identificada dacuando como "himnu de los borrachos".

El so autor foi Ignacio Piñeiro, un músicu cubanu que fixo un tema n'homenaxe a so pá, un asturianu que volviere a Asturies a morrer. Piénsase que la música orixinal yera otra y que la melodía d'anguaño foi fecha por mineros silesianos que trabayaron nes mines asturianes.

Protesta d'Andecha Astur

Andecha Astur a traviés d'una nota de prensa esixe-y al Gobiernu una actuación “inmediata, firme y contundente, paralizando asemeyada falta de respetu escontra l’himnu que representa a Asturies y a los asturianos, y desixendo les debíes responsabilidaes, polítiques y llegales al responsable/s d’asemeyada ofiensa”.

La organización fai referencia a “la falta de respetu que merez Asturies nel contestu estatal, tando ciertos de que sedríe imposible imaxinar asemeyáu usu publicitariu non yá del himnu d’España, sinón mesmamente del de Cataluña, País Vascu, Andalucía, Galicia...”.