Xera lleva ‘Árbore’ a Xixón

‘Árbore’, l’espectáculu que resume los diez años de trayeutoria de Xera, llega a Xixón el sábadu nel marcu de la ‘Semana Negra’. Eladio Díaz actúa’l domingu xunto cola so banda Control Z.

‘Lliendes’, ‘Tierra’ y ‘Llume’, los trés trabayos de Xera, son la base del discursu del protagonista, de mesmu nome qu’un espectáculu que se presentó nel últimu San Mateo con motivu del décimu aniversariu del grupu y que pudo vese per TPA en delles ocasiones. La banda centrará “esti conciertu temáticu sobre dos personaxes bien diferentes, ‘Árbore’ y la ‘Humanidá’, que falarán sobre les lluces y sombres d'una humanidá de cuestionable sostenibilidá y paradóxica riqueza”, espliquen dende la formación.

Sobre l’escenariu podrá vese un trabayu de soníos electrónicos, voces y audiovisuales, como ye vezu en Xera, grupu que se verá reforzáu pa esta ocasión con Xuacu Amieva, Aníbal Menchaca, Nuska Hernandez y la Xera-Batucada formada por Paula Amieva, Rebeca Lavandera, Pedro Menchaca, Pablo Canalís y Dudu. Amás, tán previstes delles sorpreses pa esti conciertu especial que va celebráse’l sábadu a les 22.30 hores nel escenariu central de la ‘Semana Negra’.

Restu d’actuaciones

Ente’l restu d’actuaciones anunciaes pola organización del festival de lliteratura prieto destaca tamién la d’Eladio Díaz xunto cola so banda Control Z el domingu. El saxo de Dixebra lidera esti proyeutu que presenta un propuesta sonora “radical y orixinal” con bases de jazz y con temes en dellos idiomes, como l’asturianu –‘Coyí d’un artu una flor’–, el castellanu, el francés, l’inglés o’l portugués.

Control Z ta formáu por Marco Martínez (guitarra), Antony da Cruz (baxu) y Fernando Arias (batería), a los qu’hai que sumar el raperu Grilo. Nel mes de febreru espublizaron el so primer álbum.

Amás d’estes dos actuaciones hai que resaltar les de Truequedart (sábadu 18), Vargas Blues Band (vienres), Def con Dos (llunes 13) y Carlos Jean (xueves 16). Completen el programa de conciertos nel escenario central de la ‘Semana Negra’ Rapsusklei (martes 14), Morrigans (miércoles 15) y Kozmics (vienres 17).