N'Alcordanza: del folk al rock pasando por dellos estilos musicales [VÍDEO]

Esti vienres echa a andar N'Alcordanza, festival que se presentó'l xueves. Asturies.com ufre parte de la intervención de los sos organizadores nel Café Trisquel.

El cantautor Alfredo González va abrir les actuaciones a les 20 hores nel Toma 3, pa depués pasar l’actividá, a les 22 hores, al Acapulco, onde van tar presentes FMM, Bueno, Thee Operators y Blue Dog Avenue. Los conciertos previstos pa mañana son los siguientes: Ramos & Ribera (13 hores, Alambique); Odón García, Pepín de Muñalén y Nel Suárez (14.30 hores, Canteli); Cerezal y Tejedor (16 hores, La Vida Alegre); Felpeyu y Xéliba (18 hores, Trisquel); Pin Carter, y Nacho Álvarez y el Quarteto Bendición (20 hores, Patio la Favorita); Shogun y Misiva (22 hores, Sweet 01); y Rafa Kas y cia., Alce y Navaya, y Los Kinkis (00 hores, Savoy).

La presencia de la música en llingua asturiana nesta edición ye importante, cola participación de grupos como Cerezal, Tejedor y Misiva, o d’Alfredo González. Amás de Felpeyu, que nun podía faltar nesti festival, tamién destaca’l reencuentru de Xéliba y los proyeutos musicales novedosos como’l de cantante de tonada Odón García, col acompañamientu musical de Pepín de Muñaléz (xiblata) y Nel Suárez (guitarra); el de Pin Carter, lo nuevo de Carlos Felipe Valdés, ex baxista y cantante de Mamy Carter, con lletres n’asturianu y castellanu; o la primer banda de garage en llingua asturiana, Alce y Navaya, formación que debuta y que ta compuesta por Rubén Bada y Miliu Fernández.

La intención d'esti festival ye caltener viva la memora d'Ígor Medio y Carlos Redondo, miembros de Felpeyu que morrieren nel 2006 nun accidente de tráficu camín de Catalunya cuando viaxaben a tocar a Catalunya dende Corvera na Nueche de San Xuan.