La bandera arcu iris cuelga esta fin de selmana de munchos ayuntamientos

Xixón, Uviéu, Mieres, Llaviana o Noreña son dalgunos de los conceyos asturianos onde cuelga la bandera arcu iris, símbolu de la comunidá LGTB - Entama en Xixón el "Orgullín del norte"

D’esta forma, estos conceyos amuesen la so solidaridá cola comunidá tres el pidimientu fechu por asociaciones y dalgunes formaciones polítiques. Nel casu de Noreña, foi Conceyu Abiertu’l que propunxo esti xestu, siendo bien recibíu pola alcaldesa Amparo Antuña, que tamién se comprometió a poner en marcha aiciones pedagóxiques empobinaes a reivindicar el respetu a la diversidá d’orientación sexual y d'identidá de xéneru, cumpliendo asina una moción propuesta pola agrupación d’eleutores nel 2013 y que’l Plenu aprobara por unanimidá.

Les marques llocales de Podemos, Izquierda Xunida y Mocedaes Socialistes son dalgunes de les otres formaciones qu’apoyaron esta iniciativa nos conceyos del país. Pueblu tamién fixo’l pidimientu en Ribeseya y a lo llargo del día sumáronse a la llista otros conceyos como Castrillón, Llangréu, Colunga y Nava.

El Día Internacional del Arguyu Gai celebráse’l 28 de xunu en conmemoración de los incidentes del pub Stonewall Inn, na ciudá de New York, manifestación espontánea que tuvo llugar nesi día del añu 1969 en respuesta a una de les munches redaes policiales que s’efeutuaben nesi establecimientu frecuentáu pola comunidá gai llocal. Tratóse del primer actu de desobediencia de los homosexuales estauxunidenses énte una llexislación que-yos persiguía.

El Orgullín del Norte

La comunidá gai asturiana va celebrar estos díes ‘El Orgullín del Norte’ nel camping de Deva, con munches actividaes dende güei hasta’l llunes. Mañana, a les 19.30 hores, una manifestación va percorrer les cais de Xixón pa reivindicar los derechos nun ambiente folixeru. Va salir de la Casa Conceyu y va finar en Begoña.

Na semeya, Antuña y Pérez.