“Si dalgo dexaron Ígor y Carlos foi amigos y un mui bon recuerdu”

El vienres y el sábadu va celebrase en Xixón la novena edición de N’Alcordanza, festival de música qu’axunta a 18 formaciones en nueve llocales de la ciudá en recuerdu a los ‘felpeyos’ Ígor Medio y Carlos Redondo.

“Si dalgo dexaron Ígor y Carlos foi amigos y un mui bon recuerdu, inclusive ente xente que nun tuviera un tratu continuáu con ellos”, apuntó Boni Pérez, organizador xunto a Ruma Barbero y Rubén Ardura d’esti eventu col que se pretenden que nun quede nel escaezu la memoria de los dos miembros de Felpeyu que morrieren nel 2006 nun accidente de tráficu camín de Catalunya cuando viaxaben a tocar a Catalunya dende Corvera na Nueche de San Xuan.

Como cada edición, nun atopen dificultá nenguna pa la collaboración de grupos, llocales y téunicos de soníu manera desinteresada convirtiendo a Xixón nuna ciudá volcada a la música mientres dos xornaes.

“Tiramos de xente que tea trabayando nesti momentu, con discu reciente, combinando lo que ye la veteranía cola mocedá, y tamién xuntando a músicos que llevaben tiempu ensin tocar xuntos”, esplicó Barbero, que destacó que “como yá fiximos los últimos años, repetimos la fórmula de facer un festival per diferentes llocales onde normalmente se programa música en Xixón, llocales que van dende chigres pequeños a llocales más grandes”.

Los estilos son tamién variaos: “dende la tonada, pasen pel jazz, van pel folk, acaben nel rock y, en dalgunes casos, son xéneros inclasificables”, dixo Ardura. D’esta forma, los organizadores traten de “reivindicar la escena musical asturiana nel so conxuntu”, que necesita “que se mire pa ella de varies maneres y de varios focos; dende les instituciones, dende’l públicu y dende la propia xente que toca, que faigan por reivindicar una profesión como ye la de facer música y una industria cultural como ye la música d’Asturies”.

Nesi sen, Ardura aseguró que “tán empezando a pasar coses”, en referencia a la creación de l’asociación La Caja de Músicos, en Xixón, y l’Asociación de Músicos d’Uviéu. “Ta habiendo movimientos nos que los propios músicos tomen les riendes sobre’l so propiu futuru y necesidaes”, continuó.

Pérez recordó que “dende un primer momentu esta reunión de músicos quixo tener un calter reivindicatiu, de la música en xeneral y de la música asturiana, en particular”. Les dos asociaciones reivindiquen los puntos del manifiestu que fixo públicu hai dos años N’Alcordanza y La Caja de Músicos va inclusive a intervenir mañana, a les 22 hores, enantes del conciertu previstu nel Acapulco.

Echando un vistazu atrás dende l’asoleyamientu de dichu manifiestu, Ardura considera que “nun hebo avance nengún; si acasu, dalgún atrás” no que se refier a la situación de los músicos asturianos. Sicasí, ve importante’l fechu de que los músicos, al igual que les instituciones y públicu, vayan tomando consciencia de la situación.

Parte gráfica

Amás de la faceta musical, N’Alcordanza tamién tien una parte gráfica. “Ígor tenía muncha rellación coles artes gráfiques, yá qu’estudió Belles Artes, y Carlos con xente de la ilustración, del diseñu gráficu y la fotografía, polo que l’añu pasáu encargamos a una serie d’artistes que los conocíen direutamente y trabayaren con ellos, unes postales onde nos contaran gráficamente qué ye pa ellos la música y l’oficiu de músicu”, apuntó’l tamién dibuxante Barbero.

Esti añu abrióse l’abanicu tamién a artistes que nun conocíen a Ígor y Carlos col mesmu mensaxe, creaciones que pueden consultase na web del festival. No que respeuta al cartelu d’esta edición, foi obra de Marcos Recuero, que sucede nesti honor a Fernando Gutiérrez.

Pal añu qu’entra, coincidiendo col décimu aniversariu de N’Alcordanza, la organización tien previsto facer coles postales d’esti añu y l’anterior, más les que s’encarguen nun futuru, una esposición.

Los conciertos

El cantautor Alfredo González va abrir les actuaciones mañana, a les 20 hores, nel Toma 3, pa depués pasar l’actividá, a les 22 hores, al Acapulco, onde van tar presentes FMM, Bueno, Thee Operators y Blue Dog Avenue. Los conciertos previstos pal sábadu son los siguientes: Ramos & Ribera (13 hores, Alambique); Odón García, Pepín de Muñalén y Nel Suárez (14.30 hores, Canteli); Cerezal y Tejedor (16 hores, La Vida Alegre); Felpeyu y Xéliba (18 hores, Trisquel); Pin Carter, y Nacho Álvarez y el Quarteto Bendición (20 hores, Patio la Favorita); Shogun y Misiva (22 hores, Sweet 01); y Rafa Kas y cia., Alce y Navaya, y Los Kinkis (00 hores, Savoy).

La presencia de la música en llingua asturiana nesta edición ye importante, cola participación de grupos como Cerezal, Tejedor y Misiva, o d’Alfredo González. Amás de Felpeyu, que nun podía faltar nesti festival, tamién destaca’l reencuentru de Xéliba y los proyeutos musicales novedosos como’l de cantante de tonada Odón García, col acompañamientu musical de Pepín de Muñaléz (xiblata) y Nel Suárez (guitarra); el de Pin Carter, lo nuevo de Carlos Felipe Valdés, ex baxista y cantante de Mamy Carter, con lletres n’asturianu y castellanu; o la primer banda de garage en llingua asturiana, Alce y Navaya, formación que debuta y que ta compuesta por Rubén Bada y Miliu Fernández.