San Xuan de 2006, la nueche más murnia pa la música asturiana

Un día como güei hai nueve años, los asturianos llevántamonos cola peor de les noticies; Carlos Redondo y Ígor Medio morrieren nun accidente camín de Catalunya cuando viaxaben con Felpeyu.

• La música asturiana llora güei a Carlos Redondo y Igor Medio [HEMEROTECA: 26/06/2006]

La conmoción foi inmediata y la noticia viaxó de manera rápida per tol mundu. A los miembros de Llan de Cubel llegó-yos a Estaos Xuníos, onde taben de xira, meditando mui seriamente suspendela. El chigre onde diba tocar Felpeyu en tierres catalanes dientro d'un festival folk, nun abrió esi día les sos puertes.

Sicasí, el recuerdu d'Ígor y Carlos nun quedó nel escaezu. Los sos amigos y músicos que nun los conocieron pero que sí bebieron de la so música faen pa estes feches un homenaxe: el festival N'Alcordanza. Esta edición va celebrase'l vienres y sábadu en dellos chigres de Xixón.

Pues lleer equí la noticia qu'espublizó Asturies.com na que se daba anuncia d'una de les mayores conmociones nel panorama musical asturianu de los últimos años.