Un premiu pa reactivar l’interés na Wikipedia n’asturianu

La comunidá d’usuarios de la estaya en llingua asturiana de la enciclopedia llibre va contautar col so promotor pa que l’idioma tea presente na selmana d’entrega del Princesa de Asturias.

Yá son once los años d’actividá de la Wikipedia n’asturianu, que suma casi 21.000 artículos gracies al esfuerciu d’una pequeña, y al mesmu tiempu activa, comunidá d’usuarios. Un llabor altruísta que nun tien el reconocimientu de la sociedá asturiana dao’l silenciu informativu esistente sobre’l so trabayu y, inclusive, del desconocimientu del propiu sector asturianista.

Estes torgues, sicasí, nun frenen el so crecimientu gracies a téuniques nueves que permiten l’automatización na realización d’entraes nueves. “Baxó’l númberu d’usuarios –dalgo que se repite a nivel mundial por mor de la crisis y la necesidá de la xente de buscase la vida–, pero medró l’actividá”, rellata Víctor Suárez, ún de les persones que conformen esa comunidá d’usuarios.

“Agora gracies a potentes ferramientes podemos introducir plantiyes de manera más automática y aumentar asina el númberu d'artículos", esplica.

Pese a que, de manera individual, asegura nun compartir l’espíritu de los Premios Princesa de Asturias, Suárez sí considera que la relevancia que tienen los gallardones a nivel nacional y estatal pue servir de reblagu pa la Wikipedia n’asturianu y, por esi motivu, los usuarios van tratar d’aprovechar esta circunstancia pa dase a conocer a la sociedá asturiana. “Ye fundamental que l’asturianu tea en tolos contestos”, afirma.

Nesi sen apunta que “vamos tratar de contautar col promotor de la Wikipedia, Jimmy Wales, pa que nos tenga presente si non na ceremonia de los Premios, pol fechu de que non intervenga –namái falen dalgunos de los premiaos en representación de toos–, sí nes actividaes que se celebren na selmana de los gallardones”, dalgo que cree mui factible dao’l carauter “multillingüe col que nació la Wikipedia”.

De momento, yá conversaron vía redes sociales cola responsable de prensa de la Fundación Wikimedia pa presentase como un grupu activu con casi 21.000 artículos en llingua asturiana.

Nun sería la primer vegada que Wales empondería’l llabor d’una comunidá d’usuarios nuna llingua de les nomaes minorizaes, yá que, según apunta Suárez, en Catalunya tuvo bones pallabres pal trabayu de los wikipedistes catalanes.

Contautu cola Fundación Princesa

D’igual forma, tres el fallu del Premiu Princesa de Asturias de Cooperación Internacional a favor de la enciclipedia llibre, la intención de la xente que tira de la Wikipedia n’asturianu ye ponese en contautu cola la Fundación Príncesa de Asturias pa que sean conocedores de la so esistencia y que’l so trabayu nun quede al marxe nes actividaes que se vayan desendolcar na selmana d’entrega de los gallardones nel uviedín Teatru Campoamor.  

Esa visibilidá consideren que pue servir p’aumentar l’interés de los asturianos por Wikipedia. “Pa collaborar cola enciclopedia llibre namái faen falta ganes y tiempu”, apunta Suárez, qu’anima a tolos interesaos a ponese a ello. “Tienen toles ferramientes a la so disposición y pueden contautar con cualquier de los usuarios pa que-yos eche un gabitu”, añade.

Na semeya, participantes nes xornaes que sirvieron de celebración del décimo aniversariu de Wikipedia n'asturianu nel mes de setiembre n'Uviéu y na qu'Asturies.com acudió como convidáu.