Javier Fernández y Ana Rosa Migoya alvierten que'l PSOE nun va pasar pela oficialidá

El Secretariu xeneral de la Federación Socialista d'Asturies, Javier Fernández, dixo que-y abultaba esmolecedor qu'Izquierda Xunida - Bloque por Asturies - Los Verdes plantearen "cuestiones irrenunciables" nel marcu d'un futuru alcuerdu de gobiernu colos socialistes primero de sentase a negociar. Fernández retrucaba asina a les declaraciones del candidatu d'IX-Bloque-Verdes, Jesús Iglesias, que propounxere esti fin de selmana la creación d'un modelu asturianu d'oficialidá pa la llingua nel que los ciudadanos nun sientan imposición y nel que l'alministración tea obligada a conocer l'asturianu.

L'avisu de Javier Fernández repitiólu, en términos más duros, la conseyera de cultura Ana Rosa Migoya, que se declaró partidaria de la normalización ensin oficialidá del asturianu y el gallego-asturianu, pero asitiando como tope la oficialidá. Migoya refugó cualquier debate sobre la forma en la que se pudiera llegar a la oficialidá, y, tocante a la frase d'Iglesias qu'asegureaba que nun vía a Areces renunciando a ser gobiernu por causa de la oficialidá del asturianu, Migoya retrucó que la idea cola que trabaya la Federación Socialista Asturiana ye llograr una mayoría que-y permita gobernar.