La matrícula pa la Universidá Asturiana de Branu va tar abierta hasta’l 5 de xunu

L’Academia de la Llingua Asturiana (ALLA) abrió’l plazu de matriculación pa la Universidá Asturiana de Branu (UABRA), que va celebrase en Cangas del Narcea del 3 al 14 d’agostu baxo la direición de María Cristina Valdés. Les persones interesaes tienen hasta’l 5 de xunu pa formalizar la so inscripción.

La decana de la Facultá de Filosofía y Lletres sustitúi nesta sesta edición de la UABRA a Xosé Antón González Riaño, agora vicepresidente de l’ALLA, mentes que se caltién nel cargu de secretariu Pablo Xuan Manzano. D’esta forma consolídase entovía más el venceyu de la Universidá d’Uviéu cola UABRA, institución que lleva collaborando dende’l primer añu na so organización, al igual que’l Conceyu de Cangas del Narcea. El formatu d’esta iniciativa de l’ALLA nun va sufrir cambios, cola celebración de los cursos clásicos, la ufierta de cuatro ‘Cursos d’Afondamientu Cultural y Llingüísticu’ y d’otros seis d’estensión universitaria p’alumnos de la institución. De manera paralela, tamién se celebrarán delles charres y actividaes en Cangas.

Los cursos más veteranos son el ‘Cursu Elemental de Llingua Asturiana’ y el ‘Cursu Avanzáu de Llingua Asturiana’, que tienen un costu de 300 euros, cantidá qu’inclúi los materiales y la pensión completa na Escuela-Hogar de Cangas, y consten de 60 hores llectives. A ellos hai que sumar el ‘Cursu de Gallego-asturiano (primeira fase)’, destináu a maestros d’Infantil, Primaria y Secundaria, qu’esti añu va durar los doce díes de la UABRA y tien el mesmu preciu de matrícula que los anteriores.

La ufierta de los ‘Cursos d’Afondamientu Cultural y Llingüísticu’, destinaos a maestros o llicenciaos, y persones que tengan el ‘Cursu Avanzáu de Llingua Asturiana’, ta formada por cuatro opciones. La primer selmana (del 3 al 8 d’agostu) va impartise ‘Capacitación pa la traducción al asturianu’, a cargu de la direutora de la UABRA, y ‘Más presees d’aplicación escolar na rede’, coordinada por David Melendi. Mentes, pa la segunda selmana (del 10 al 14 d’agostu), Isabel Hevia va dar ‘Xestión cultural n’Asturies: creando cultura al traviés de los medios’ y Loreto Díaz Suárez, ‘Averamientu al cine n’asturianu’, nel que va participar l’actriz María Cotiello, ente otros profesores, nel programa formativu. La matrícula pa estos cursos, de 35 hores llectives, ye de 190 euros, con too incluyío.

Cursos d’Estensión Universitaria

Tres la esperiencia del añu anterior, nesta edición de la UABRA entámense otra vegada ‘Cursos d’Estensión Universitaria’ en collaboración cola Universidá d’Uviéu col qu’estudiantes universitarios van poder algamar 4,5 o 6 creitos de llibre configuración. La ufierta nesta estaya ye la siguiente: ‘Cursu Elemental de Llingua Asturiana’ y ‘Cursu Avanzáu de Llingua Asturiana’, de 40 hores llectives; y ‘Cursu de capacitación pa la traducción al asturianu’, ‘Más presees d’aplicación escolar na rede’, ‘Xestión cultural n’Asturies: creando cultura al traviés de los medios’ y ‘Averamientu al cine n’asturianu’, de 30 hores llectives.

El día caberu pa inscribise pa la UABRA ye’l vienres 5 de xunu, siendo l’horariu pa formalizar la matrícula na sede de l’ALLA (L’Águila 10, Uviéu)  –pa lo que ye necesario abonar l’importe y llevar una semeya– el siguiente: de llunes a xueves, de 9 a 15 hores y de 16 a 19 hores; y de 9 a 14 hores, los vienres. Por mor de la demanda alta que tienen estos cursos, la institución va siguir un orde rigurosu d’inscripción.