La web de l'ampliación de capital del Uviéu incorpora l'asturianu

'Locos por verte ganar', web de l'ampliación de capital del Uviéu, incorporó la llingua asturiana. La opción d'utilizar l'idioma del país activóse con motivu del Día de les Lletres Asturianes.

D'esta forma, l'asturianu súmase al castellanu, inglés, francés, chinu y xaponés nesta plataforma que permite la merca d'aiciones del Uviéu pela rede. De momento, l'ampliación ta na primer fase, na que pueden comprar los aicionistes actuales de la sociedá anónima deportiva –trés por cada títulu que se posee–, con más de 360.000 euros recaudaos hasta la fecha. La so segunda fase, de tramu llibre, va principiar el día 21.

Otra manera, el club uviedín saludó per megafonía a la so afición en llingua asturiana'l domingu nos instantes previos del partíu énte'l Somozas, que ganaron los llocales pol resultáu de 2-1.