Una terminoloxía sobre Bioloxía conviértese na decimotercer propuesta de TermAst

Xosé B. Álvarez Álvarez ye’l responsable de ‘Términos de Bioloxía’, la decimotercer propuesta de TermAst de l’Academia de la Llingua Asturiana. Trátase d’un pallabreru col vistu bonu de la institución que naz pa servir d’utilidá a los profesionales qu’empleguen l’idioma y al públicu en xeneral.

El proyeutu TermAst ye una iniciativa conxunta de l’Academia de la Llingua Asturiana (ALLA), el coleutivu Softastur y el Colexu Oficial d’Inxenieros n’Informática del Principáu d’Asturies. Ésta tien como oxetivu recoyer iniciatives individuales o grupales de propuestes terminolóxiques en campos de los que sían especialistes, dexando estes pallabres al serviciu de los profesionales y falantes, que podrán, o non, faceles propies y da-y usu. Darréu, será la institución académica la que dirá inxiriéndolos dientro de los sos calces normativos.

La propuesta sobre Bioloxía ye la decimotercera d’una llista compuesta por términos d’economía y empresa, terminoloxía xurídica y alministrativa, matemática, médica, postal, física, educativa, teoría de la lliteratura, turismo, meteoroloxía, teatru y artes escéniques, y fútbol. El so responsable ye Álvarez Álvarez, uviedín afincáu en Caerdydd/Cardiff, onde desendolca’l so llabor profesional. Dende Cymru trabayó esti vocaboluriu que recueye pallabres como ‘abdome’ (Cavidá de los animales vertebraos asitiada ente’l tórax y la pelvis que contién les coraes, sacante los pulmones y el corazón/Parte posterior del cuerpu de los animales artrópodos), ‘noyu’ (Abultamientu que sal nun tueru, na caña d’un árbol/Bultu que se forma nos tendones, nos güesos al axuntase/ Puntu onde se crucien o d’onde arranquen delles coses) o ‘zooplancton’ (Grupu d’organismos non fotosintéticos que s’atopen nel plancton), ente otros munchos, col so equivalente en castellanu. Un pallabreru que va ser de muncha utilidá tanto pa los profesionales del sector como pa tolos falantes d’asturianu.