El trabayu d’El Cencerru na recuperación de los Sidros y les Comedies, merecedor del III Premiu Timón de Cultura Asturiana

El xuráu del III Premiu Timón de Cultura Asturiana, qu'entama L'Arribada, otorgó’l gallardón a l’Asociación pola Recuperación de los Sidros y les Comedies ‘El Cencerru’ de Valdesoto. Esti coleutivu ye clave nel procesu recuperación y difusión de les mazcaraes d’iviernu n’Asturies y ún de los meyores embaxadores del país nel esterior con Los Sidros y La Comedia.

Aurora García Rivas, Carlos Espina Alonso, Illán Gonzali, Verónica Rodríguez y Humberto Gonzali como presidente, con Mayte González Cobos faciendo la función de secretaria, decidiéronse pola candidatura d’El Cencerru “en reconocencia al pervaloratible trabayu que vien faciendo esta entidá poles mazcaraes d’inviernu, les comedies de sidros y otros elementos rellacionaos que formen parte d’un patrimoniu inmaterial d’enorme valir cultural”. La mazcarada de Valdesoto ye una de les más actives del país, con presencia en numberosos eventos dientro y fuera d’Asturies. El principal ye’l Festival Internacional Máscara Ibérica (FIMI) que se celebra en mayu en Lisboa, con alredor de 300.000 visitantes na capital portuguesa, y nel que Los Sidros y La Comedia son fixos –y amás protagonistes– dende l’añu 2009.

El Cencerru sucede d’esta forma nel palmarés del Timón de Cultura Asturiana, “destináu  a asociaciones, sociedaes, fundaciones y otres entidaes que tengan como fin la conservación y promoción de la identidá cultural de nueso”, a l’Asociación Cultural Ensame Sidreru (2013) y la Xunta pola Defensa de la Llingua Asturiana (2014). El restu de coleutivos nominaos nesta edición del gallardón qu’entrega l’Asociación Cultural L’Arribada yeren la Fundación Belenos, l’Asociación Cultural San Tirso del Eo, la Fundación Nueva Asturies, la Fundación Caveda y Nava, Iniciativa pol Asturianu y Wikipedia n’asturianu.

Los otros dos Timón

Enantes del fallu d’esti Timón, diose a conocer el dedicáu a los escritores en llingua asturiana y eonaviego y el d’autores asturianos en castellanu, a los qu’aspiraben aquellos nacíos nel 1965 o enantes. Los ganadores foron Esther Prieto y Francisco García Pérez, de manera respeutiva, que van recoyer el premiu –una figura del ceramista xixonés Jesús Castañón– xunto colos de Valdesoto nun actru mientres La Vagamar, l’actividá setembrina de L’Arribada.