Barla sustitúi a Díaz Galán al frente del Avilés

El direutor deportivu del Real Avilés, José Manuel Barla, garra'l bancu del equipu pa salvar la temporada. El club destituyó esti martes a Ismael Díaz Galán tres sumar 3 puntos de 12 posibles.

Tres sustituyir nel cargu de direutor deportivu a Chus Bravo depués de la salida del Avilés de Gol Plus y la llegada del escocés John Clarkson, el gaditanu tien agora la responsabilidá de recuperar a un equipu en cayida llibre na segunda vuelta y asegurar la permanencia. El conxuntu blanquiazul ta anguaño empatáu col Atlético Astorga a una plaza y un puntu perriba de la promoción, que marca'l Zamora cola mesma puntuación que'l primer club en descensu, el Llangréu.

Con esta decisión, Barla conviértese nel tercer inquilinu del bancu del Avilés nesta temporada. Josu Uribe, tres la espectacular campaña anterior, dirixó la plantiya hasta hai cuatro xornaes, cuando'l club decidió dar el mandu a Díaz Galán, pero l'avilesín nun supo reconducir el rumbu del equipu y sumó trés derrotes y un únicu trunfu frente al colista Marino. Agora'l gaditanu, ensin esperiencia previa como primer téunicu nel fútbol senior, tien el retu difícil d'asegurar la permanencia en Segunda División B nun añu de transición nel Avilés.