Un xuez convoca la Xunta Xeneral d'Aicionistes del Sporting pal 6 de mayu

La denuncia puesta por Tu Fe Nunca Decaiga pola non convocatoria de la Xunta Xeneral Ordinaria d'Aicionistes del Sporting salió alantre. El xuez obliga a la entidá a celebrala'l 6 de mayu.

El Sporting solía convocar la Xunta pa los díes caberos d'avientu, como marca la llei –seis meses tres la finalización del exerciciu–, dalgo que nun se dio nel 2014. La razón espresada dende'l conseyu d'alministración del club xixonés yera la intención de celebrala tres llevar alantre'l procesu de venta del club, pa que'l propietariu nuevu participara nella, inclumpliendo asina la llei, pero la realidá ye que nenguna de les negociaciones entamaes pol vicepresidente Javier Fernández llegó a bon puertu. El secretismu por parte del fíu del máximo aicionista y l'esmolecimientu pola situación económica de la sociedá llevó a Tu Fe Nunca Decaiga, asociación que trabaya en recuperar el club pa los sos socios, a denunciar esta situación nel xulgáu, recibiendo la razón por parte del xuez.

Asina, Francisco Pañeda, maxistráu del Xulgáu númberu 3 de lo Mercantil de Xixón, estableció como fecha de la Xunta Xeneral d'Aicionistes del Sporting el miércoles 6 de mayu a les 18 hores, en primer convocatoria, y a la mesma hora del día siguiente, en segunda, nel Palaciu de Congresos y Esposiciones del Recintu Ferial Luis Adaro. L'orde del día va ser l'esame y aprobación, nel so casu, de les cuentas añales, auditaes, rellatives al exerciciu 2013/2014, fináu a fecha 30 de xunu del 2014, análisis del informe de xestión y decisión sobre la propuesta d'aplicación del resultáu y la xestión social; presentación de los presupuestos pa la temporada 2014/2015; ruegos y entrugues; y aprobacion del acta de la Xunta en cualquier de les modalidaes previstes na Llei.