IAS llega a un alcuerdu eleutoral con Izquierda Xunida en Mieres

Izquierda Xunida (IX) va contar col sofitu d'Izquierda Asturiana (IAS) en Mieres. Faustino Zapico va en representación de la formación nacionalista na llista de la coalición al conceyu.

En concreto, l'historiador va ocupar l'octavu puestu de la candidatura encabezada pol alcalde Aníbal José Vázquez Fernández, col compromisu de formar parte del equipu de gobiernu nel casu de volver a ganar les eleiciones. Esti alcuerdu eleutoral aprobóse nuna asamblea de militantes celebráu'l pasáu 23 de febreru onde s'afitaron una serie de compromisos irrenunciables qu'IX aceptó: la inclusión del conceyu abiertu como forma participativa d’ellaboración del presupuestu municipal, l’aplicación d’una política llingüística tresversal en tol conceyu y la oposición a los pautos col PSOE.

L'alianza ente IX y IAS de cara a les municipales del 24 de mayu diose de momento namái en Mieres, anque tán abiertes negociaciones pa facer lo propio n'otros conceyos del país.