El Biesca Xixón proclámase Campeón d'Europa de h.oquei femenín

Asturies tien un equipu campeón d'Europa. El Biesca Xixón proclamóse esti fin de selmana Campeón d'Europa de h.oquei sobre patines femenín. Les asturianes vuelven a llevase'l troféu européu tres ganalu nel 2007, a lo qu'hai qu'amestar el trunfu na lliga española nesta temporada. La final, disputada en Coutras (Francia), cayó del llau del Biesca tres vencer na tanda de penaltis por 1-0 al equipu catalán del Voltregá.

Un partíu mui disputáu ente les asturianes y les catalanes acabó col trunfu pola mínima de les primeres frente a les campeones d'Europa del añu pasáu. Foi tan igualáu que lo mesmo nes dos partes que na posterior prórroga el marcador nun se movió, teniendo que llegar a la tanda de penaltis. Tres nueve disparos paraos por caúna de les  porteres o llanzaos fuera poles xugadores, finalmente Natasha Lee fue quién a tresfomar el suyu, un gol que diba significar la victoria del equipu asturianu. La Copa d'Europa volvía d'esti mou, dos años depués, al nuesu país de la mano de les xugadores del Biesca.
 
Ficha técnica

Voltregà 0 – Biesca Xixón 1

Voltregà: Vives, Giudicci, Monpart, Romero y Barceló (Dorca y Ferrón).

Biesca Xixón: Klein, N. Lee, Soler, Ainhoa y Luchi (Bárbara).

Goles: 0-1 Lee na tanda de penaltis.

Árbitros: Jacquart (francés) y Carlo Carponi (italianu). Partíu ensin tarxetes azules.