La oficialidá del asturianu volvió reivindicase nes cais d'Uviéu

|

Un bon númberu de persones, unos 2.000 según la organización, exixeron n'Uviéu que la llingua tenga'l mesmu tratu qu'otres llingües. Nuna movilización convocada pola Xunta pola Defensa de la Llingua Asturiana y al traviés d'un comunicáu cargaron contra les "poques families polítiques" que nos últimos 30 años ficieron gala d'una "sordera institucional" por nun reconocer oficialmente l'asturianu.

La manifestación salió a les 19.00 hores de la Estación de Renfe d'Uviéu y acabó ante'l Teatru Campoamor, onde a les 20.30 hores va entamó l'actu solemne de l'Academia de la Llingua pa celebrar el Día de les Lletres. Como novedá, nesta movilización contó con un grupu de panderetres que abrió la marcha, interpretando cantares referentes a la reivindicación llingüística. Distintos colectivos, sindicatos y formaciones polítiques participaron na movilización.

Nel manifiestu, la Xunta cargó contra los partíos mayoritarios, a los qu'acusó de caltener una actitú "irresponsable" al considerar el patrimoniu llingüísticu asturianu como una "molestia". Sicasí, la Xunta señaló que'l movimientu de reivindicación llingüística qu'existe n'Asturies tien un apoyu d'una mayoría social, cada día más amplia.

Mostráronse partidarios de siguir puxando por espacios plurales unitarios como'l Conceyu Abiertu pola Oficialidá, qu'inclúi a más de 250 organizaciones y entidaes de tou tipu. Amás, consideraron indispensable que la nueva reforma del Estatutu incluya la oficialidá. "Los asturianos nun somos menos que naide y nun vamos aceptar que se mos nieguen los derechos que mos pertenecen", dixeron.
 
Asturies.com ufre a los sos llectores, nun archivu adxuntu a esta noticia, el discursu completu de la Xunta pola Defensa de la Llingua Asturiana.

Contador Estadistiques