Ediciones Seronda zarra tres cuatro años de trabayu

El proyeutu editorial Seronda cesa l'actividá tres cuatro años de trabayu y trés llibros n'asturianu. La crisis y la falta d'una política llingüística, dalgunos de los motivos d'esta decisión.

Laura Tuero y Paco Álvarez principiaron n'abril del 2011 esta aventura que fina esti febreru con ocho títulos espublizaos, dalgunos de munchu ésitu como los dedicaos a Manuel Preciado o a los futbolistes de lleenda de la primer división inglesa, de nome 'Mañana saldrá el sol' y 'Leyendas de la Premier', de manera respeutiva. Nel so catálogu apaecen los llibros n'asturianu 'Un país llamáu Dixebra', del propiu Álvarez; la torna del italianu a la llingua asturiana de 'Una storia semplice', de Leonardo Sciascia; y la obra billingüe 'El paséu', de Miguel Rojo.

En declaraciones a Europa Press, l'editor y periodista xixonés fai referencia a la crisis, l'escesu d'editoriales, la falta de mercáu y l'ausencia d'una política llingüística por parte del Gobiernu como los motivos pa tomar esta decisión. Según opina, les perres destinaes a l'ayuda a la espublización editorial deberíen dirixise a la promoción de los títulos p'algamar una presencia mediática mayor y más repercusión na sociedá.