Alcuentru de cultura asturiana y gallega

|

La cultura asturiana y gallega van tener puntu d'alcuentru nel conceyu de Santu Adrianu esti sábadu día 9. La xuntanza dase gracies al VII Alcuentru de Pandereta asturiana y gallega, qu'entamen tolos años dos persones bien conocíes nos sos países pola so dedicación a la música tradicional, Guillerme Ignacio nel país galego y Xosé Antón Fernández "Ambás" pola parte astur.
 
Tanto Ambás como Guillerme decidieron va ya 7 años que yera necesario aumentar los llazos de intercambiu ente dos cultures tan cercanes y parecíes como l'asturiana y la gallega, pero que munches vegaes viven d'espaledes. En qué se paez el toque de pandereta de les dos tradiciones, que peculariedaes tien caún de lso instrumentos, como se adpaten distintes coples a los estremaos idiomes, y en qué se traduz eso nuna zona de contactu directu como'l Navia-Eo, son cuestiones que se pueden observar nestos alcuentros. Los mayestros de ceremonies de la xuntanza, Ambás y Guillerme, son grandes conocedores de la música popular asturiana y gallega, Guillerme arriendes d'investigador ye tamiñen cantante y gaiteru del grupu Quempallóu, grupu qu'espublizó un discu nel que collaboró'l la otra pata de la conexón astur-gallega, Ambás, convirtiéndose asina nel primeru que cuenta cola colaboración d'un cantante asturianu y el primeru que canta una pieza na nuesa llingua nel país vecín.
 
Otra vuelta los Alcuentrus céntrense na actuación d'una grupu de cada país. Asina dende Galicia va venir a tierres asturianes Veña que vai!, dende O Morrazo, mientres que pela parte asturiana van tar Les Pandereteres de Nerbia. Como ye vezu nesti alcuentru, dempués de los conciertos la música va lliberase de los repertorios pesllaos, y los cantares de pandereta y los bailles ya nun dexarán de sonar nun viaxe constante ente Galicia y Asturies.
 
L'Alcuentru va celebrase n'El Sabil, hotel rural que yá acoyó estos alcuentros na so primer edición. P'acutar agospiu namás qu'hai que llamar a El Sabil, que tien un preciu especial pa toos aquellos que quieran averase hasta'l Conceyu de Santu Adrianu y quieran quedar dormir.

Contador Estadistiques