Un pasu alantre

Sobre la mio implicación nel proyectu de Somos Asturies

Xune Elipe.

Depués de pensar y repensar fondamente, pesie a los plazos tan curtios que se dieron, decidí aceptar la invitación de Somos Asturies a participar nesti proyectu y integrame na so llista pal Conseyu Ciudadanu d’Asturies. Alloñáu dende hai bien d’años de la política activa, entendida ésta como la integración nuna organización, pero venceyáu a ella de manera clara al traviés de les distintes reivindicaciones llingüístiques, culturales, sociales, llaborales o populares en xeneral que se dieron nesti país nes últimes décades, nes que participé siempre que reclamaron el mio apoyu, poniendo’l mio nome y la mio persona al so serviciu o de manera anónima, doi un pasu alantre y llevo’l mio compromisu más acullá.

ASTURIANISMU

Adopto esta decisión en base a delles reflexones que quiero compartir, non como una xustificación, sinón como una visión de la realidá asturiana que m’empobina a garrar esti camín. Activista dende bien mozu del movimientu de reivindicación llingüística y militante de la izquierda soberanista dende hai más de trenta años, abúltame qu’ésti ye ún de los peores momentos d’esi entramáu al que llamamos asturianismu. Por centrame namás nel aspectu políticu, creo que ye manifiesta la nuestra incapacidá pa xenerar en toos estos años un proyectu aglutinante, seriu y estable que fixere de contrapesu a les élites político-sindicales que gobiernen esti país dende’l fin formal del franquismu. La relevancia social del asturianismu políticu nunca foi muncha, pero agora ye nula. Autoconsideraos como los «guardianes de les esencies nacionales», nun fuimos quien a tresmitir con claridá’l nuestru mensaxe; somorguiaos na pureza ideolóxica refuguemos a tou aquel que nun siguiera los nuestros dogmes y, llamativamente, movímonos mui a gustu nel nuestru inmovilismu. Too esto, a lo que tamién hai qu’añader cuestiones ayenes al propiu movimientu como’l ninguneamientu, cuando non el rechazu frontal, a les nuestres posiciones por parte de los principales medios de comunicación del país, fixo que nunca llegaremos a algamar un nichu electoral que nos diere una representación institucional, non yá curiosa, sinón cenciellamente testimonial.

OPORTUNIDÁ HISTÓRICA

Llegáu a esti puntu decido dar un pasu alantre y arriesgar, pasar de les palabres a los fechos, moyame y «manchame» con esti proyectu abiertu, plural y en construcción, nel que coincidimos xente que tenemos un conceptu nacional d’Asturies y otra que non, vieyos militantes de milenta causes y persones que ye la primer vez que s’involucren políticamente, asturiano y castellanofalantes, persones del ámbitu urbanu y del rural, amigos y desconocíos, compañeres de llucha y collacios del grupu musical col qu’intentamos dar voz a los y les que nun la tienen... Y ello porque toi enfotáu en que salgamos del guetu-bucle nel que tamos sapozaos los soberanistes d’izquierda nesta tierra; porque creo que tamos nun momentu d’emerxencia nacional, con un paru bultable, una perda de población importante pol exiliu llaboral (sobremanera ente la mocedá), con una curva de natalidá de les más baxes d’Europa y una sociedá cada vez más avieyada y con un sector considerable d’ella fuera del sistema productivu (pensionistes), con un esfarrapamientu del texíu industrial constante y n’aumentu, con un esaniciu del paisaxe propiu pola so subsidiariedá del sector servicios (con una «turistización» descomanada en detrimentu de les actividaes tradicionales y respetuoses col mediu ambiente), con un apoyu a les nuestres llingües y a la nuestra cultura por parte de l’alministración mui per debaxo del mínimu razonable... Por estes y otres tantes razones, creo qu’hai qu’aprovechar la oportunidá histórica que se nos presenta de poder camudar la dinámica política que venimos careciendo n’Asturies dende hai más de trenta años. Pero pa ello hai que ser quien a llograr una mayoría social mui amplia, o polo menos suficientemente grande, que pueda da-y la vuelta a esta realidá. Y ello conlleva una praxis política qu’incluya y non escluya, qu’integre sectores y ideoloxíes variaes, escaecer los sectarismos y ufiertar una gran dosis de xenerosidá; en definitiva nun hai más solución que la unidá popular. Considero, amás, que nel contestu políticu actual, presentase a les elecciones autonómiques con una candidatura esclusivamente soberanista-nacionalista-asturianista nun valdría más que p’amosar la nuestra debilidá social, al quedar retrataos polos previsiblemente mui curtios apoyos electorales. Ye’l momentu de salir de la marxinalidá y d’axuntar fuercies, d’asumir responsabilidaes reales y pasar de la teoría a la práctica, aportando la nuestra esperiencia y el nuestru pensamientu a un proyectu que nun ye exáctamente’l que quixéremos, pero que pue convertise nuna ferramienta amañosa pa empezar a cambiar Asturies.

SOBERANÍA Y OFICIALIDÁ

Intégrome, eso sí, con dos principios a los que nun pienso arrenunciar, que quiero facer públicos, y que si nun se dieren produciríen la mio desvinvulación darréu. Ún ye’l respetu a la soberanía asturiana, ye dicir, a que les decisiones surdíes dende Asturies seyan respetaes y s’alcuerden ensin inxerencies esteriores, como garantía de que la voluntá de los asturianos y asturianes ye la que realmente va dirixir el camín a siguir. L’otru ye que la igualdá de derechos nel ámbitu llingüísticu, esto ye, la oficialidá de la llingua asturiana (y del gallego-asturianu nel so ámbitu) seya parte fundamental de la propuesta de rexeneración que s’ufierte al Pueblu Asturianu, qu’asina se recueya nel programa electoral, ensin eufemismos nin xeneralidaes vacues y qu’esta cuestión seya defendida de manera clara y contundente. Esti asuntu tien de tratase con toles especificidaes que la situación sociollingüística propia requier y de la coyuntura política futura que se vaya a dar (pa la reforma estatutaria necesítense 3/5 del conxuntu de la Xunta Xeneral, esto ye, 27 diputaos), pero tien de reflexase nes propuestes programátiques y nos oxetivos a algamar y, entrín y non, debe puxase por una política llingüística lo más avanzada posible que permita la llexislación actual, hasta que se dean les mayoríes o los alcuerdos posibles pa cambiala. Otra manera, tamién considero indispensable concretar les midíes a desenvolver nesti asuntu nos primeros cien díes de gobiernu si, llegáu’l momentu, hai que ponese a esa xera.

Soi de la opinión de que si bien n’otros territorios del Estáu la superación del llamáu Réxime del 78 pasa pola reconocencia del derechu a decidir si quieren o non siguir venceyaos a él, n’Asturies, con una conciencia nacional mui baxa que nun permite abrir agora esi debate, pasa, eso sí, indefectiblemente pola equiparación de derechos llingüísticos qu’acabe col apartheid que sufren les nuestres llingües propies y que los partíos de la «castra» impunxeron hai yá más de tres décades. Estos dos puntos: soberanía y oficialidá, son básicos y primordiales pa que pueda siguir trabayando nel proyectu que supón Somos Asturies.

D’otra banda, quiero dexar claro qu’esta decisión nun supón nenguna torga pa que siga teniendo como referentes a siguir y potenciar a organizaciones y espacios como Izquierda Asturiana, Conceyu Abiertu, Compromisu por Asturies, Darréu, Xunta Estudiantil Asturiana o La Llegra, colos que me siento comprometíu, formen parte del mio pensamientu políticu y cuenten con tol mio apoyu. El so llabor ye fundamental pa siguir asturianizando políticamete’l nuestru país, p’acabar col cainismu y les engarradielles internes que tanto dañu nos fixeron y dir creando un clima afayadizu que, nun futuru, pueda permitir la construcción d’un espaciu políticu nel que confluyamos tolos y toles militantes de la izquierda soberanista.

Soi consciente de les contradiciones y les duldes qu’esti pasu qu’agora doi va xenerame y de les crítiques que voi recibir, entiéndoles y asúmoles con respetu y tolerancia, pero les ganes de tresformar Asturies y avanzar hacia un horizonte muncho meyor son más fuertes y el convertime nun protagonista activu d’ello anímame y ilusióname. Nun quiero dexar pasar esta oportunidá que se nos presenta de facer d’Asturies un país xustu, solidariu y respetuosu con tolos derechos que les persones que nél vivimos tenemos o deberíemos tener. Na midida de lo posible quiero contribuyir, por eso póngome en movimientu y doi un pasu alantre.