Rubiera refuga una propuesta d’Iniciativa pa llevar el billingüismu al so departamentu

Iniciativa pol Asturianu amosó la so disconformidá con Carlos Rubiera tres la negativa del edil a llevar el billingüismu a la Conceyalía d’Educación, Cultura, Mocedá y Fiestes. La propuesta consistía en que “tolos materiales asoleyaos pol so departamentu apaecieren nes dos llingües, asturianu y castellán”.

Inaciu Galán, presidente d’Iniciativa pol Asturianu, encargóse de llevala’l martes al Conseyu Asesor de la Llingua Asturiana de Xixón, ensin una respuesta positiva por parte de Rubiera pese a que, según espresa’l coleutivu, “nun supondría nin un euru de gastu estraordinariu” pal Ayuntamientu. “La nuesa propuesta ye cenciella: redacte una orde pa que tolos materiales que dependan de la so conceyalía salgan espublizaos nes dos llingües, nel mesmu documentu (yá seya cartelu, folletu, etc.) o nel ámbitu oral (anuncios en radio, por exemplu)”, dalgo que nun llevaría gastu porque la torna podría facela la Oficina de Normalización Llingüística de Xixón. El pidimientu d’Iniciativa pol Asturianu contaba col sofitu de l’Asociación Cultural L’Arribada y de ‘Reciella. Families pol Asturianu’ al traviés de los sos representantes nel muérganu entamáu pol Conceyu de Xixón, Berto Álvarez Peña y Montse Blanco, de manera respeutiva

“Llamentamos la postura de Rubiera, que pese a tener una trayectoria destacada en defensa de la llingua asturiana nel pasáu, nestos cuatro años nun dio un solu pasu na normalización de la llingua asturiana, siguiendo namás coles más qu’insuficientes acciones de promoción yá establecíes n’anteriores mandatos”, espresen dende Iniciativa pol Asturianu, coleutivu que recuerda que la propuesta refugada “ta dientro del marcu llegal y respuende al mandatu de les Ordenances Municipales de Normalización Llingüística de Xixón aprobaes pol plenu nel añu 2008 y ensin llevar alantre dende entós”. “Namás ye preciso tener la voluntá política de facelo y nun queremos pensar que nun la tien”, recordó Galán na so intervención nel Conseyu Asesor de la Llingua Asturiana de Xixón.