‘Harry el Suciu’ prestó-y más al 61 por cientu de los llectores d'Asturies.com

El rostru impenetrable (One-eyed Jacks)’ y ‘Harry el Suciu’ son les dos películes doblaes al asturianu por Gonzali Producciones qu’emitió TPA. Nel nuesu ‘Conceyu Abiertu’ entrugamos a los nuesos llectores cuál-yos prestó más, resultando escoyida la protagonizada por Clint Eastwood.

Un 61 por cientu votó por ‘Harry el Suciu’, mentes qu’un 8 por cientu preferió’l western de Marlon Brando y un 31 por cientu disfrutó de les dos por igual. Lo cierto ye que dambes foron un ésitu d’audiencia, superando la media de la canal y, nel casu de la segunda, triplicando los datos de filmes en castellanu. Amás xeneraron un riegu de bonos comentarios nes redes sociales, lo que da esperanza a que la direición del ente públicu de comunicación siga apostando pol doblaxe de películes a la llingua llariega.

Dende esti momentu yá ye posible participar nun ‘Conceyu Abiertu’ nuevu. Nesta ocasión queremos conocer qué espeutatives tienen los nuesos usuarios sobre la postura que vaya caltener Podemos con respeuto a la oficialidá del idioma nel casu de que, como indiquen les encuestes, tengan opción de gobernar o d’influyir nel Gobiernu entrante.