Echa a andar l’Atenéu Nel Amaro pa “fomentar y estender la figura y obra” del artista mierense

El sábadu presentóse en sociedá l’Atenéu Nel Amaro, una asociación que naz pa “estender la figura y obra” del artista polifacéticu de Quentuserrón, fináu nel 2011 a los 64 años d’edá. Ente los sos oxetivos ta'l fomentu del usu del arte “como ferramienta de tresformación social”.

Pese al temporal que vivió Asturies esta fin de selmana, un grupu de persones acudió al actu de presentación del Atenéu Nel Amaro celebráu nel paséu fluvial de Mieres, baxo’l puente onde ta asitiada la escultura ‘La gaviota’ de J. Rubio Camín, cumpliendo la esixencia cursada na invitación: traxe de cóctel pa les muyeres y media etiqueta pa los homes. L’oxetivu yera dar a conocer esta asociación qu’echa a andar “pa promocionar, fomentar y estender la figura, obra y llegáu del célebre artista multidiscisciplinar asturianu Nel Amaro, asina como promover too tipu d’investigaciones de carauter cultural qu’abarquen los ámbitos de conocimientu y desarrollu rellacionaos col universu de Nel Amaro”.

D’igual forma, los miembros del coleutivu quieren aprovechar la figura del que fora escritor, poeta visual, dramaturgu y performance pa, siguiendo los sos pasos, facer del arte una “ferramienta de tresformación social”. Asina, ente les intenciones qu’anuncia l’Atenéu Nel Amaro ta “desendolcar un programa en rellación col conxuntu de la sociedá, onde sía posible trabayar con too tipo de medios cola idea d’hallar formes de creación nueves; promocionar y difundir l’arte desarrollando canales alternativos y fomentando el mestizaxe ente costumes aparentemente non artístiques y práutiques que sí lo son; y dinamizar la sociedá al traviés d’actividaes culturales rellacionaes sobre manera col mundu del arte en toles sos facetes”.