Entreguen n’Uviéu los Premios Lliterarios 2014

El paraninfu de la Universidá d’Uviéu repite esti xueves como sede de la gala de los Premios Lliterarios 2014 qu’entrega la Conseyería d’Educación, Cultura y Deporte. El viceconseyeru Alejandro Calvo y Ana María Fueyo, direutora xeneral de Política Llingüística, acudirán en representación del Gobiernu.

Mientres la seronda pasada aconceyaron los xuraos establecíos pa decidir la obra merecedora de caún de los cinco gallardones que convoca la conseyería, resultando ganadores Carlos González Espina, con ‘Cápsules de tiempo’ (VII Premiu María Xosefa Canellada de lliteratura infantil y xuvenil); Damián Barreiro, con ‘Caleya Sésamu: el papel de la televisión na tresmisión interxeneracional de la llingua’ (XX Premiu Máximo Fuertes Acevedo d’ensayu); Enrique Carballeira, con ‘L’arume de la tierra’ (VI Premiu Alfonso Iglesias de cómic); Antón García, con ‘Crónica de la lluz y la solombra’ (XXXV Premiu Xosefa Xovellanos de novela); y Ángeles Carbajal, con ‘L’aire ente la rama’ (XX Premiu Xuan María Acebal de poesía). Toos ellos van recibir una pieza artística esclusiva “otorgada en reconocencia a la calidá de les sos obres y la so significación como aportaciones sobresalientes y innovadores a la creación lliteraria en llingua asturiana”, de nome ‘Árbol de les lletres’, a lo qu’hai que sumar una recompensa de 3.000 euros.

La gala va principiar a les 19.30 hores y nella destaca l’ausencia otru añu más de la conseyera Ana González. Tres la entrega de los gallardones va tener llugar una actuación de Mapi Quintana y Elías García, dúu que nel 2014 asoleyó'l discu ‘Severina’.