Estrénase en Cangues la versión asturiana d’un documental d’Álvarez Armada sobre la etnia Yi

El cineasta candasín Daniel Álvarez Armada, bon conocedor de la realidá china tres vivir ocho años nel país, presenta esti xueves na Casa Cultura de Cangues d’Onís el documental ‘L’añu de los Yi’. Antón Caamaño pon la voz na versión asturiana de la cinta dedicada a esta minoría étnica.

‘L’añu de los Yi’ rellata la vida de les persones d’esti pueblu con llingua propia, el nosu –que cuenta con alfabetu propiu y tradición lliteraria–, que tien el so llar nel Himalaya oriental y que ye una de les 56 etnies reconocíes pola República Popular China. En total, conformen una población cercana a los 7 millones, la mayor parte en territoriu chinu, que caltienen delles tradiciones que pueden tener ciertes asemeyances coles asturianes, como pue ser la matanza.

El documental, que cuenta con versión n’asturianu, castellanu, francés y chinu, va proyeutase esta tarde per primer vegada nel Estáu y va ser en llingua asturiana. Con voz del actor Antón Caamaño, Álvarez Armada cuenta la vida d’esta etnia a la que llega n’ochobre del 2013 al traviés d’una amiga coincidiendo col cambiu d’añu de los Yi, que cuenta con un calendariu diferente de 10 meses de 36 díes con un periodu de 5 díes que nun pertenez a nengún añu y nel qu’esta minoría étnica celebra un ritual especial que, por desgracia, ta perdiéndose. La Casa Cultura de Cangues d’Onís va acoyer la estrena de la cinta a partir de les 20.30 hores.