Izquierda Xunida fala de “despreciu a los asturianos” y fai referencia a la oficialidá como solución definitiva al asuntu de la especialidá

Emilia Vázquez, diputada d’Izquierda Xunida (IX) na Xunta Xeneral, declaró que’l refugu del Ministeriu d’Educación, Cultura y Deporte a la especialidá ye un “despreciu a los asturianos”. Solicitó implicación al Gobiernu y apuntó necesaria la oficialidá del idioma pa solucionar el problema.

“Ye un despreciu al sentir de los asturianos”, apuntó Vázquez, que cargó contra’l Partido Popular (PP) por nun respetar el pidimientu de la Xunta Xeneral de la declaración de la especialidá d’asturianu, moción propuesta por IX que contó col votu favoratible de tolos grupos a esceición del popular na sesión del 21 de payares. Al so xuiciu, el Gobiernu nun se pue dar por satisfechu cola negativa del ministeriu y demanda la implicación de la conseyera Ana González o del presidente Javier Fernández pa reconducir la situación. “Eso ayudaría a que’l ministru viese que ye una cuestión importante pal Gobiernu d’Asturies”, esplica la diputada.

Por último, apuntó a la oficialidá como solución a estes negatives continues que sufre la llingua asturiana en cuestiones educatives. “Cualquier otra consideración más moderada amosó’l so fracasu”, sentenció Vázquez. La intención d’IX ye llamar l’atención del Gobiernu pa que declare la oficialidá si de verdá ta pol llabor de defender los derechos llingüísticos de los asturianos y va presentar iniciatives na Xunta Xeneral nesi sen.