Taresa Lorences destaca la preocupación d'Enriqueta Rubín pola muyer y el desinterés periodísticu hacia los pueblos

La profesora de Filoloxía de la Universidá d'Uviéu, Taresa Fernández Lorences, destacó güei la preocupación de la escritora Enriqueta González Rubín (Santianes del Agua, 1832 - L'Infiestu, 1877), autora de la primer novela en prosa n'asturianu ('Viaxe del tíu Pacho el Sordu a Oviedo') por temes que "siguen d'actualidá güei", como la marxinación de la muyer o'l desinterés de los medios de comunicación hacia los pueblos d'Asturies y en favor de la capital.
 
Lorences ofrecerá esta tarde una conferencia na Casa la Cultura de Ribesella pa repasar la vida y obra d'esta escritora asturiana de sieglu XIX a la que ta dedicada la edición d'esti añu de la Selmana de Les Lletres Asturianes, que se desarrolla nesti momentu, y que mañana celebra'l so día grande, el Día de Les Lletres. Precisamente, la charra va enmarcase dientro del programa d'actividaes.
 
En declaraciones previes a Europa Press, Lorences destacó la "actualidá" de los temes qu'Enriqueta González Rubín trató a lo llargo de la so carrera lliteraria, principalmente compuesta d'artículos d'opinión, pero tamién de poemes y de la primer obra en prosa escrita en llingua asturiana, mencionada anteriormente.
 
La mayor parte de los sos artículos publicáronse nel periódicu'l Faro Asturiano. El so director, Protasio González Solís, recoyó nel so llibru 'Memorias Asturianas' una recopilación de les collaboraciones incluyíes nel mesmu, figurando nél la mayor parte de trabayos de Rubín. Munchos d'ellos tán dedicaos, según Lorences, a la educación de les  muyeres, "como salida a la so subordinación social", a los malos tratos, a la situación de la banca, a la crítica a los cures "facciosos" frente a los que "yeren bona xente", y a la distinción social ente ricos y campesinos.
 
Tamién se refirió "al problema de que los d'Uviéu nun entendieren la fala de la zona de Ribesella". Amás, dedicó dalgunos artículos a criticar el fechu de que "la prensa d'Uviéu sólo s'ocupe d'Uviéu y non de Ribesella, como si nun hubiere otros llugares".
 
Estos últimos aspeutos se ven espeyaos nel so 'Viaxe del tíu Pacho el Sordu a Oviedo', nuna nueva edición que presentó la Conseyería de Cultura nesta Selmana de les Lletres n'edición facsimilar, y que s'inclúi tamién nel llibru 'Obra completa', que de la mesma manera va presentase mañana na Casa la Cultura de Ribesella. D'esta última obra destacó la so "gran carga irónica y crítica", amás del so carácter "divertíu y fácil de lleer".
 
Pa Lorences estes temátiques son "actuales", especialmente l'asuntu del desinterés hacia les zones rurales.
 
ESCRITORA PROFESIONAL
 
Lorences destacó'l carácter "profesionales" de l'actividá lliteraria d'Enriqueta González Rubín, y muestra d'ello señaló qu'entamó "mui moza", a la edá de 22 años, a collaborar cola publicación El Nalón, que s'editó ente ochobre de 1854 y xunu de 1855. Nesti mediu compartió páxines con firmes de renome, como Máximo Fuertes Acevedo o Robustiana Armiño.
 
Señaló tamién el fechu de que debió tener una educación apropiada al so orixe de clase alta, dau'l so altu nivel cultural, que nun se correspondía cola escasa xeneralización del sistema educativu de la época.
 
Tuvo nueve fíos, y los que sobrevivieron emigraron a Cuba. Nesti momentu, en Ribesella'l so únicu parentescu lu constitúin los descendientes del segundu matrimoniu que tuvo'l so pa, qu'enllazó con Joaquina Herrero tres morrer la so ma.