Preséntase en La Llume con una folixa la iniciativa Glayíos/Oihuak

Esti llunes va tener llugar la presentación en sociedá de la iniciativa Glayíos/Oihuak, promovida por Ixuxú Asturies-Euskal Herria elkartea y el Colectivu Xuvenil Glayíos. Va celebrase nel xixonés Centru Social La Llume ente les 17 hores y la medianueche.

Glayíos/Oihuak trátase d’un ciclu d’intercambios musicales ente grupos asturianos y vascos entamáu pola yá conocida asociación d’asturianos n’Euskal Herria que busquen promocionar la cultura asturiana nesi país y el coleutivu Glayíos, formada por xente mozo que tuvo emigráu en dellos territorios europeos y vieron la desconocencia esistente fuera de les nueses llende de la realidá asturiana. Asina, dambes organizaciones van promover conciertos n’Asturies y n’Euskal Herria mientres tol 2015 de formaciones asturianes y vasques cola fin de llevar la cultura de cada pueblu al otru, tando la primer cita programada pal 31 d’esti mes n’Uviéu con una actuación conxunta de Skama la Rede y los donostiarres Skakeitan, cita con entraes de 5 euros con merca anticipada y de 8, na puerta.

Esta iniciativa va ser presentada esta tarde con una folixa en La Llume (cai Nava, númberu 1) na que va haber espaciu pa la música, el baille y una proyeición. A les 17 hores va principiar l’actividá cola apertura d’un mercadín de discos asturianos y vascos a precios especiales nel que los asistentes van poder escoyer ente más de 60 referencies. Una hora más tarde, los responsables de Glayíos/Oihuak van esplicar la filosofía d’esta actividá y los oxetivos colos que naz, pa continuar col visionáu del documental ‘Izan pirata’, qu’esplica la historia de Donostiako Piratak, un movimientu qu’impulsó les fiestes populares en Donostia nel 2003, hasta esa fecha mui asemeyaes a les de Xixón. “Nin espíritu colectivu, nin participación ciudadana, nin presencia del movimientu popular y asociativu... Programación vertical impuesta y nós, namás qu'espectadores individuales esperando a ver qué conciertos nos van caer cada añu. A ún que-y presta la fiesta como conceptu; como oportunidá pa construyir otru tipu de rellaciones humanes más cercanes y colectives; como ocasión pa tresgredir, reivindicar y pasalo bien al mesmu tiempu..., nun pue más qu'esmolcese pol modelu festivu d'una ciudá cada día más gris como Xixón”, llamenta Xicu Ariza, ex redautor d’Asturies.com y cabeza visible del proyeutu Ixuxú, que nagua por avanzar nel mesmu camín que Donostiako Piratak pa da-y un xiru a la Selmana Grande xixonesa.

Glayíos Antisystem Music Selekters

La folixa de presentación de Glayíos/Oihuak va continuar, magar les 20 hores, con una pinchada a cargu de Glayíos Antisystem Music Selekters, conformáu por persones d’Ixuxú y del coleutivu Glayíos. Asina, hasta medianueche, va poder sentise nel llugar drum&bass, soul, punk-folk, electroswing, jungle, hip hop, música balcánica, rock o ska, ente otros estilos. La entrada ye llibre y la organización pon a disposición de los presentes un pinchéu que se pue acompañar con sidra L’Allume y cerveza Caleya, dambes etiquetaes dafechu n’asturianu, a precios populares.