“Dicir Llanes ye dicir fiesta”, asegura Cerra

Yolanda Cerra, especialista n'investigaciones patrimoniales y rituales festivos del oriente del país, dio la conferencia 'Fiestas y bandos en Llanes: entre la tradición y la innovación' dientro de la programación mensual d’Ástura. “Dicir Llanes ye dicir fiesta”, aseguró al tiempu qu’emponderó’l modelu llaniscu.

L’Atenéu Obreru de Xixón acoyó, como ye vezu, la charra d’Ástura, coleutivo que  convidó nesta ocasión a la llicenciada en Filoloxía pola Universidá d'Uviéu y n'Antropoloxía Social y Cultural pola UNED. Amadéu Benavente presentó en primer llugar a Cerra y calificó de “estraordinariu” el fechu festivu llaniscu, “que nun tien comparanza en toda Asturies y posiblemente n’España”, en referencia a la esistencia de trés bandos: la Madalena, San Roque y La Guía. Pela so parte, la miembru del Real Institutu d’Estudios Asturianos (RIDEA) repasó en primer llugar lo que ye l’antropoloxía de la fiesta, rama de l’antropoloxía social y cultural qu’ella estudia, que garró fuercia na década de los 80 tres el procesu de recuperación de les folixes populares que tuvo llugar a finales del franquismu y na Transición y que tien como referente d’estudiu, según afirmó la esperta, al sevillanu Isidoro Moreno.

“Dicir Llanes ye dicir fiesta”, espresó pa entrar en faena en referencia a “l’abundancia de fiestes na villa y nel conceyu”, toes elles con unos referentes similares: presencia del ramu, de les aldeanes y d’homes vistíos de porruanos. Un modelu festivu que se repite “en Llanes y en tol oriente”. Sicasí, la villa de Llanes cuenta con un fechu diferencial como son los bandos, “que dan respaldu y sofitu a la fiesta, pero que son el modelu al empar”, apunta Cerra. Los sos oríxenes tienen llugar nel sieglu XIX, nel añu 1837, como faiciones polítiques d’una etapa nueva. Tres la muerte de Fernando VII y el fin del absolutismu, el poder repartióse ente dos partíos, el moderáu y el progresista o ‘exaltado’. Los segundos decidieron adelantar la celebración de les eleiciones previstes na seronda del 1837 y entamaron una fiesta popular pal día de la Madalena, el 22 de xunetu, a lo que los moderados respondieron faciendo lo propio pa San Roque, 16 d’agostu.

Perda de la carga política

“Suponen una innovación, pero al mesmu tiempu van contracorriente” pola so reactivación de la devoción polos santos nun tiempu nel que’l cultu a la virxe María y a Xesucristu desplazara a los primeros. Les élites, úniques con accesu a votu, foron les responsables del espoxigue de dambes fiestes, “que pronto serán asumíes pol pueblu, desapaeciendo asina la carga política y asentándose como una rivalidá ente barrios”, apunta Cerra. Asina, la Madalena queda pa los ciudadanos d’intramuros, esto ye, dientro la muralla, y San Roque pa extramuros. Nesti puntu, recuerda que la patrona de Llanes ye la Nuesa Señora, el 15 d’agostu, festividá que “queda un poco arrequexada”. Esta potenciación de les fiestes dase dende 1880.

Los bandos, que “contribuyeron al caltenimientu del patrimoniu relixosu del conceyu”, “tienen independencia con respeuto a la Ilesia”, esto ye, “nun son cofradíes”. “¿Qué ye un bandu? Ye dalgo indescriptible”, continúa Cerra, qu’apunta que podíen entendese como “una agrupación vecinal”. El fechu diferencial de Llanes, sicasí, dase cola entrada d’un tercer bandu, el de La Guía. “Ye una devoción vieya de los arrabaldes de Llanes, los marineros y la xente de fuera” que tenía una celebración humilde en comparanza coles otres. Son los “cambios sociales” los que contribúin al ascensu d’esta fiesta que tien llugar el 8 de setiembre y que se convierte en bandu mientres el franquismu, pasando a ser la principal de la villa xunto con San Roque, y desplazando un tanto a la Madalena.

Pocos cambios

Un videu de la celebración de La Guía nel 1917, cuando tenía llugar namái alredor de la ermita, y otru de la d’esti añu sirvió a los presentes pa conocer la evolución d’esta fiesta concreta. Les novedaes principales son la baxada a la ilesia parroquial y el bautismu de neños y neñes menores d’un añu al final de la Danza d’Arcos.

Les carauterístiques de los ramos y les ḥogueres, les lletres estereotipaes “en castellanu” y los roles de xéneru foron les temes siguientes sobre les fiestes, pa finar colos traxes. Éstos utilícense dende siempre y vienen del “fenómenu européu esistente nesi tiempu qu’asumía’l vistíu col territoriu”. Esta identidá étnica llevaba a les moces riques de la villa a vistir como les clases baxes, d’aldeanes, y estos traxes caltiénense anguaño. “Aliementa’l ritual”, esplica Cerra. La esperta, por último, emponderó’l modelu festivu: “Ye interesante y defendible porque fomenta l’actitú participativa y la responsabilidá. Nun hai esclusividá; entra quien quier. Amás, gusta y ta n’espansión”, afirmó.

Na semeya, Cerra y Benavente.