Paco Álvarez lleva’l XI Concursu Manuel Nevado Madrid na estaya d’asturianu

El xueves, Día de Santa Bárbola, diéronse a conocer los ganadores del XI Concursu de Rellatos Mineros Manuel Nevado Madrid. El vencedor d’esti añu na estaya d’asturianu foi Francisco Álvarez González por ‘Identidá’, mentes que Marisa López Diz y María Elena Álvarez Teresa llevaron dos menciones.

Esta edición del concursu dedicáu al históricu llíder mineru antifranquista qu’entama la Fundación Juan Muñiz Zapico, venceyada a Comisiones Obreres d’Asturies (CC OO), tuvo un total de 124 participantes d’Asturies y otros puntos del Estáu, y de llugares tán llonxanos como Cuba, Arxentina, Costa Rica, Italia, Suiza, Alemaña y Francia. Toos ellos con una mesma temática que fai esti concursu únicu nel mundu: la mina. La vencedora absoluta foi Lourdes Aso, con ‘El juego del ahorcado’, siendo’l premiu na estaya de llingua asturiana –que tamién opta al gallardón primeru del concursu– pal periodista xixonés Paco Álvarez gracies al rellatu ‘Identidá’. Nél un narrador estauxunidense de West Virginia cuenta –amestando delles pallabres n’inglés– la historia del so güelu, Andrew, un mineru emigrante asturianu que crució’l charcu pa combatir na Guerra Civil ensin tener la posibilidá de pisar otra vegada Asturies. La recompensa pa esti áccesit ye de 350 euros –200 en metálico y 150 en llibros–, mentes que pal premiu absolutu ye de 600 –300 en metálico, llibros y un grabáu de Manuel Calvo valoráu en 300 euros–.

Pola calidá de los testos, el xuráu formáu pol caderalgu de lliteratura Benigno Delmiro Coto –como presidente–, Mapy Artidiello, Ángel Enrique Fernández González, Antonio González  Abulez y Marcelino Sánchez Álvarez, decidió tamién otorgar dos menciones especiales López Diz, pol rellatu ‘¿Cómo ye la mina?’, y Álvarez Teresa, por ‘El rei de les solombres’. El restu de ganadores del concursu foron Alicia Calvo (accésit mozu con ‘Los surcos en Sabero’) y Miguel Ángel Collado (testimoniu históricu con ‘Empezaba a refrescar’). Mentes, algamaron menciones María del Mar Imaz, Beatriz Menéndez, Alberto Álvarez Rodríguez, Miguel Ángel Gayo y José Ibarra.

Tolos rellatos premiaos anunciáronse de manera pública ayeri nun actu celebráu na Casa Cultura de Llugo nel que participó Damián Manzano, secretariu xeneral de la Federación d’Industria de CC OO, y Delmiro Coto, que foi homenaxáu tres la so xubilación. Ana María Alonso Cabrera, secretaria xeneral de CC OO n’Uviéu, encargóse de lleer el testu ganador.