El 'casu Gürtel' fuercia la dimisión de Mato

La ministra de Sanidá, Servicios Sociales y Igualdá, Ana Mato, presentó na tarde del miércoles la so dimisión. Failo tres conocese l'autu del xuez de l'Audiencia Pablo Ruz pol 'casu Gürtel'.

El maxistráu zarró ayeri la investigación de la primer parte (años 1999 a 2005) de la rede de corrupción política venceyada al Partido Popular (PP) cola propuesta de xulgar a 43 imputaos pola trama, ente ellos los trés ex tesoreros de los populares. Nel autu inclúi a Mato como responsable civil al considerala partícipe a títulu d'aprovechamientu de los delitos cometíos pol so ex maríu, Jesús Sepúlveda. Asina, Ruz considera que la yá ex ministra beneficióse de viaxes y regalos por un valor superior a los 60.000 euros.

Mato presentó la dimisión tres una reunión celebrada con Mariano Rajoy. Según dalgunes informaciones, foi'l propiu presidente del Gobiernu estatal el qu'afaló a la ministra pa que dexara'l cargu pol mieu a que l'asuntu acabara chiscando-y. La dimisión presentóse al traviés d'un escritu nel que recuerda que nun ta imputada en delitu nengún pol xuez Ruz.