Rodríguez Cueto recueye’l premiu de la Tertulia Malory por ‘Carne de melandru’

La Tertulia Malory escoyó recién a ‘Carne de melandru’ como meyor llibru n’asturianu editáu nel 2013. L’autor, Milio Rodríguez Cueto, va recoyer el gallardón esti vienres nun actu públicu que van tener llugar nel pub entreguín Tom Malory.

Esti establecimiento ye’l centru de reunión selmanal de la Tertulia Malory dende hai 16 años, grupu d’amigos que dende hai trés decidió entamar un premiu pa “prestixar les lletres asturianes, al empar que se da difusión a les obres que, a criteriu del xuráu, sían consideraes los meyores llibros escritos cada añu n'asturianu”. Un pasu que consideraben “pernecesariu” nel ámbitu de la lliteratura asturiana “tanto poles posibilidaes de visibilidá y proyección social que-y pue dar a la creación lliteraria como pola contribución al prestixu del asturianu como llingua”. Asina, tres ‘La neve del cuquiellu’ (2011), de Xabiero Cayarga, y ‘La Chelita’ (2012), de Ruma Barbero, el llibru ‘Carne de melandru’ de Rodríguez Cueto escoyóse como’l meyor del 2013 por un xuráu compuestu polos escritores Xulio Arbesú, José Luis Rendueles, Pablo Rodríguez Medina, Solinca Turbón, David Fernán, Roberto Corte, Chechu García y Henrique G. Facuriella.

“La maestría del artificiu narrativu que constrúi Rodríguez Cueto a la hora de contar a les xeneraciones más nueves l'ambiente, los valores y les rellaciones personales d'un tiempu col que la mayoría d'ellos cuenta que nun tien nada que ver” foron les razones que-yos convencieron por apostar pola obra del xixonés, que güei va recoyer el gallardón a les 17.30 hores, consistente nuna ilustración d'Alfonso Zapico y una medaya conmemorativa. ‘Carne de melandru’ trátase d’una novela curtia cola que l'autor yá ganara’l V Premiu Maria Xosefa Canellada de lliteratura infantil y xuvenil de la Conseyería d'Educación, Cultura y Deporte del Gobiernu d'Asturies; un rellatu ambientáu na posguerra española na que’l protagonista ye un rapacín fíu d’un presu republicanu “que descubre, en dos díes, el valor de la vida, la sinrazón de la muerte, la cobardía y la traición”. Acompañen el testu les ilustraciones d’Alberto Álvarez Peña.