Día del Llibru Asturianu

Bloque por Asturies prevé cambios na so direición nacional tres el Conceyu que va celebrar esti sábadu

|

El Bloque por Asturies prevé "cambios" importantes nos sos órganos de direición, la Direición Nacional y la Xunta Nacional, tres el Conceyu Nacional que va celebrar esti próximu sábadu, de magar les 10.00, nel Hotel Asturias de Xixón.
 
Asina lo anunció güei'l voceru de la organización, Pablo Fernández, qu'ofreció una rueda de prensa xunto a la secretaria d'organización, Lourdes Gru, pa presentar esti Conceyu Nacional.
 
Según confirmó Fernández s'esperen cambios tanto na Xunta Nacional como na Direición Nacional, si bien nun quiso adelantar los posibles nomes qu'entren o salgan de dambos órganos, nin tampoco si la so cabeza más visible, Rafael Palacios, actual director de l'Axencia de Cooperación al Desarrollu del Principáu, va siguir formando parte d'ellos.
 
Pa Fernández, "nun ye conveniente que les persones se consoliden nos puestos, porque pue xenerar dependencies", dando asina a entender que van salir aprobaes les propuestes de cambiu nos principales niveles del partíu.
 
Amás de les cuestiones orgániques, van aldericase una serie de ponencies polítiques que van tratar los siguientes temes: mocedá y inmigración, sociedá llaica, medios de comunciación, crisis, política cultural, música tradicional, deportes y política municipal. La conseña del Conceyu va ser 'Xuntos somos', y nél va tratase d'emponderar el "conceutu de ciudadanu, frente al de consumidor, que ye'l qu'impera nesta sociedá", esplicó Fernández.
 
Nel Conceyu van tomar parte, según el voceru del Bloque, unos 100 delegaos representantes de 537 afiliaos. Sicasí, Gru matizó que va tratase d'una actividá abierta, polo que va poder participar y opinar tol que lo desee.

Contador Estadistiques