Músicos asturianos van homenaxar al artesanu gaiteru Berto Velasco en L’Entregu

El sábadu va celebrase nel Teatru Municipal de Samartín del Rei Aurelio el II Memorial Berto Velasco, que pretende homenaxar a ún de los luthiers de gaita asturiana más importante na historia del instrumentu. Nél participa’l so fíu, Berto Varillas, y persones destacaes de la música asturiana.

Esti actu garra’l relevu del que tuvo llugar en payares del 2012 nel Centru Municipal Pumarín-Xixón Sur, yá qu’esta ciudá foi’l so llugar de residencia hasta la so muerte, n’agostu del 2011. Agora, por enfotu de la so familia, esti homenaxe de la música asturiana a Alberto Fernández Velasco –que tien la idea de ser itinerante– pasa a celebrase en Samartín del Rei Aurelio, conceyu nel que nació nel añu 1942 –na población de L’Acebal–. Va ser nel Teatru Municipal, asitiáu en L’Entregu, a les 19 hores, cola presencia yá confirmada de los intérpretes de tonada Chucha de Nembra, Avelino Corte, Lorena Corripio y Fernando Valle Roso, asina como de la Banda Gaites Fonte Fuécara, los maestros gaiteros Pedro y Diego Pangua, y el tamboriteru Fabián Fernández. Una esbilla de la importante escena de la música tradicional asturiana a la que tamién se suma’l fíu del homenaxáu, Berto Varillas.

Tamién van tar enriba l’escenariu Manuel García Miranda ‘Manolín de Mases’, amigu del homenaxéau, y el profesor d'Acústica del Conservatoriu Superior d'Uviéu, Miguel Ángel Fernández, col oxetivu d'emponderar la figura personal de Berto Velasco y el so llabor profesional nel desarrollu de la gaita asturiana. Naciu Varillas, el so sobrín, va encargase de presentar l’eventu, que tien entrada de baldre hasta completar l’aforu.

Una trayeutoria más que destacada

Nacíu nel 1942 en L’Acebal de L’Entregu, Fernández Velasco aficionóse a la música asturiana de mozu, mercando la so primer gaita a los 16 años. Nel 1968 treslladóse a Xixón pa trabayar como ebanista, oficiu que más alantre dexó pa dedicase a la so gran pasión: la gaita. Asina, fadría’l so primer instrumentu nel 1979 siguiendo’l modelu tradicional d’Antón Álvarez Vega ‘Cogollu’. Dende esi momentu, foi perfeicionando la so téunica, trabayando sobre manera cola acústica, hasta convertise nel artesanu favoritu de munchos gaiteros del país. Ente los sos avances destaca’l so primer punteru con escala temperada, desendolcáu nel 1985, anque quiciabes el más importante foi’l punteru cromáticu de dos octaves, fechu a partir del 1988.

Nos años siguientes, l’artesanu gaiteru siguió trabayando nos aspeutos téunicos de la gaita, col deséu de que pudiera tocase con normalidá xunto con otros instrumentos y que quedara establecida como materia d’estudiu nel Conservatoriu. Esta trayeutoria más que destacada fixo a Berto Velasco merecedor d’un güecu destacáu na historia de la música asturiana. Por ello, dende mayu una placa recuerda la so memoria nel Muséu de la Gaita del Pueblu d’Asturies.