¿Qué significa pa vusté’l 8 de setiembre?

Asturies.com púnxose en contautu con delles persones destacaes de la vida social, cultural y artística asturiana pa conocer cómo celebren el Día d’Asturies y lo que significa pa ellos el 8 de setiembre. Éstes son les sos respuestes.

1. ¿Qué significa pa vusté'l 8 de setiembre?
2.  ¿Qué va facer nesta xornada?

David M. Rivas, profesor titular d’Estructura Económica de la Universidad Autónoma de Madrid

1. Ye'l día la patria. Yo toi más pol 25 de mayu pero representa dalgo sacrao, lo más íntimo y permanente d'una nación.
2. Esti añu taré fuera d'Asturies. Si toviere en casa diría a la convocatoria de Conceyu Abiertu.

Xurde Morán, presentador

1. Una oportunidá perdida.
2. Si too sal bien, descansar depués d'unos díes d'escursiones.

Pablo Texón, escritor

1. Namás qu'un día nel que nun se trabaya.
2. Lo que llevo faciendo tolos 8 de setiembre de la última década: dir a la romería de Miravaḷḷes.

Miguel Fernandi, comentarista deportivu y cantante de Skama la Rede

1. Pa min ye'l Día de la Nación Asturiana o Día d'Asturies. ¿Qué me prestaba otra fecha? Seguramente, pero creo que la izquierda soberanista tenemos qu'algamar otres victories prioritaries primero de proponer otra fecha pa vindicar los nuestros derechos colectivos como pueblu. Anque ye verdá que me gustaba más el 25 de mayu.
2. Voi dir a Uviéu a la manifestación xunitaria de la izquierda soberanista. Préstame que depués de munchos años d'actos per separao haiga convocatories comunes. Tamién ye verdá que me prestaba que la manifestación del 8 de setiembre se ficiera nel llugar onde se faen los actos institucionales. De fecho, gustaríame que la celebración del Día d'Asturies se fixera dalgo asemeyao a lo del Día de Castiella, sía nun mesmu sitiu o rotativu. En Villalar de los Comuneros celébrase nel mesmu llugar la fiesta institucional y hai carpes de tolos colectivos políticos y sociales. Ye una esperiencia a imitiar, que non copiar.

Lluis Nel Estrada, cocineru, consultor y comunicador

1. El 8 de setiembre siempres sedra pa min el Día de la Nación Asturiana o'l Día d'Asturies, que nun dexa de ser lo mesmo. Pa min ye un día de reivindicación y celebración a partes iguales.
2. Dempués de munchos años plantégome tornar a tar presente na movilización d'Uviéu #LluchandoPolaSoberanía... Paezme una convocatoria illusionante y un exerciciu de responsabilidá como asturianu militante. El restu'l día pasarelu cola mio xente.

Sofía Castañón, escritora

1. La verdá ye qu’una tiende a ser iconoclasta coles feches, y nun soi quien a da-yos muncha importancia.
2. Acabo de dame cuenta qu'esti añu ye llunes y contaba cola rutina propia de un día llaboral. Nun tengo nengún plan especial.

Inaciu Galán, presidente d’Iniciativa pol Asturianu

1. Esti día ye una celebración de lo que ye esti país, un momentu que ta pa facer alcordanza del pasáu, de la nuesa hestoria, pero sobre manera habría ser un momentu pa reflexonar sobre'l futuru que queremos p'Asturies, pa la so llingua, pa la so cultura, pa tantes coses que nun tán diendo bien.
2. Como ye festivu aprovecharé pa poner al día trabayos que s'acumulen na mesa y tamién pa celebrar esta xornada en familia y con collacios, anque entá nun tengo claro, hai planes interesantes a esgaya pa esi día.

Rafa Palacios, ex direutor de l'Axencia de Cooperación al Desarrollu del Gobiernu d'Asturies

1. El 8 setiembre ye´l Día de la Nación Asturiana, el Día d´Asturies. Un día de reivindicación y llucha pola soberanía política, la independencia económica y la xusticia social nel mio país, Asturies.
2. Esti 8 setiembre voi tar trabayando na Patagonia arxentina pola igualdá d’oportunidaes y la equidá de xéneru, pero col mio corazón enllenu d’Asturies.

Xune Elipe, cantante de Dixebra

1. Una fecha simbólica na que se conmemora la nacencia d'una de les naciones más antigües d'Europa: Asturies.
2. Dir a la manifestación de la esquierda soberanista n'Uviéu y a los actos entamaos por ella.

Inaciu Iglesias, empresariu y presidente de la comisión d’Economía de Foro

1. Una oportunidá de celebrar lo que somos y de proyectar lo que queremos ser pa en delantre. Tien muncho que ver cola identidá y ye mesmo celebración que reivindicación; entrambes les dos coses.
2. Lo más seguro, voi pasar el dia en familia y escribiendo.

Xandru Fernández, escritor

1. Estes feches simbóliques pa quien teníen que significar daqué yera pa los poderes públicos, especialmente pal autonómicu, como si fuera'l día señaláu pa facer visible un proyectu de país. Pero como nun hai proyectu de país, supongo que dirán a rezar a Cuadonga.
2. Nun cuento facer nada especial esi día, igual acercame a la manifestación qu'hai n'Uviéu.

Luis Arias Argüelles-Meres, escritor y columnista

1. La prueba inequívoca del fracasu que supón que la sociedá democrática nun decidiera celebrar una fiesta civil que tenga significáu p’Asturies, el 25 de mayu, por exemplu.
2. Descansar a orielles del Narcea, escribir, lleer y tar cola mio familia.

Yolanda Huergo, abogada y política

1. Dende va munchos años y cada vez más, el día perfectu pa dame cuenta de qu'el país que me gustaría tener nun ye'l país que dalgunos piensen que tienen. Un día ensín escuses pa salir a la cai y atopáse con xente a la que m'apetez ver y que piensa igual que yo.
2. Salir a la cai, como tolos 8 de setiembre de los tengo memoria. Ésta vez n'Uviéu. Ellí taré.

Aurora García Rivas, escritora

1. Unha maneira d'acordarme de que somos un país dentro d'España.
2. O de sempre, limpiar, cociñar y escribir se me queda tempo.

Beatriz R. Viado, periodista

1. Lo bono del 8 de setiembre ye que ye un día festivu, y lo malo ye que se repiten los actos institucionales, los discursos aburríos que naide escucha y ¡hasta hai misa! A pesar de les mios poques simpatíes a la fecha, tamién reconozo que ye un día bien afayadizu pa la reivindicación, anquen nun sía el más adecuáu históricamente (según lo que se quiera reivindicar, claro). Pero tien la ventaya de qu’esisten unos marcos de referencia –que diría George Lakoff– ente la sociedá alredor de la xornada que quiciás tea bien aprovechar pa enllenalos d’otros conteníos.
2. Esi día voi dedicalu a preparar la maleta pa volver a marchar. Cuando compré’l billete dime cuenta de que, anque pensaba que’l 8 de setiembre nin me diba nin me venía, sí que tien un dalgo de significáu personal que se manifiesta en fadiura y cansanciu. Paecíame que diba ser irónicamente triste marchar en plenu ‘festexu’, asina que garro’l vuelu al otro día, en xornada llaboral, laica y neutral.

Lisardo Lombardía, direutor del Festival Interceltique de Lorient

1. Ye la fiesta oficial del nuesu país. A min prestariame más el 25 de mayu, pero Cuadonga nun hai qu’escaecela nin dexar que la recuperen los de siempre.
2. Toi entovia de vacaciones. Adobe que trataré d'apurar el tiempu de fuelgu.