Avientu va tocar nel ‘Asturies nun escaez’

La histórica banda del rock-folk asturianu Avientu torna a los escenarios catorce años depués pa celebrar el so venti aniversariu. Va ser nel marcu del Día de la Mocedá Revolucionario, nel XI Conciertu ‘Asturies nun escaez’, qu’entama Darréu’l 18 d’ochobre n’Uviéu y nel que tamién van participar La Tarrancha, Skontra, Skama la Rede y Ochobre.

Asturies.com yá se fixera ecu de los comentarios en redes sociales de la posibilidá de que los de Riosa tornaren a xuntase pa esti conciertu y a última hora d’ayeri la organización moza confirmó la so presencia nel ‘Asturies nun escaez’. D’esta forma, Avientu repite nesti festival, onde celebró la so actuación última na so primer edición celebrada nel añu 2000 y organizada por Andecha Mocedá, na que tamién tocaron OI! N'Ast, Intolerance, N'Arba y los vascos Betagarri y Etsaiak. La so presencia fai d’esti conciertu una cita mui esperada polos aficionaos al rock-folk n’Asturies, yá que van poder disfrutar en direuto 14 años depués de los clásicos de los riosanos, qu’editaron nos sos seis años de vida trés discos: ‘Tírate abaxo’ –namái en formatu cassette–, ‘¿Y agora qué...?’ y ‘Glayíos dende’l fondu’.

Van completar el cartelu del ‘Asturies nun escaez’ dalgunes de les bandes más destacaes de la escena musical asturiana, como La Tarrancha, Skontra, Skama la Rede y Ochobre, grupu homenaxe a Avientu de creación nueva compuestu por xente de la zona de Riosa. Hai que destacar qu’esti añu cúmplanse 80 años de la revolución d’ochobre del 34, motivu d’homenaxe d’esti eventu dende la so nacencia, que va completase con actividaes n’Uviéu’l vienres 17 y la mesma xornada del sábadu.

Entraes a la venta próximamente

La sala Sir Live va ser la sede de les actuaciones musicales dende les 20 hores. El preciu de les entraes va ser de 8 euros, anticipada, y de 10, na puerta, y éstes van tar pronto a la venta nel Ochobre y el Centru Social Autoxestionáu La Semiente (L’Entregu); L’Espumeru y Matteria (La Felguera); La Habana (Mieres); Revoltosa y Canteli (Xixón); L’Esperteyu y L’Arcu la Vieya (Uviéu); el Mesón Monte Aramo (Riosa); La Traviesa (L’Infiestu); El Cuévanu (La Pola Siero); Bar Lennon’s (Llugones); Cinema Rock Bar (Ḷḷena); El Cafetón (Avilés); La Bodega (Villaviciosa); y Corquiéu (Ribeseya).