Siete de les doce funciones del Salón de Teatru Costumista Asturianu de Candás van ser estrenos

‘El calendariu’, obra de José Ramón Oliva a cargu de la compañía femenina Les Ayalgues de Carreño, va abrir esti miércoles el XXIV Salón de Teatru Costumista Asturianu de Candás. Va ser el primer de los siete estrenos anunciaos nesti certame, compuestu por doce funciones, una diaria hasta'l 31 d'agostu.

El Teatru Prendes va acoyer les actuaciones protagonizaes por formaciones de teatru amateur que trabayen un xéneru que caltién tirón ente’l públicu, como amuesen los enllenos que vive la instalación candasina mientres tolos díes del salón o nes representaciones que se celebren n’otros puntos d’Asturies. Un exemplu más del ciñu que tien la xente hacia l’idioma del país, anque non toles formaciones cuiden la correición llingüística como se debería. El grupu llocal Les Ayalgues de Carreño torna a abrir la cita col estrenu d’una obra, nesti casu ‘El calendariu’, firmada por José Ramón Oliva, que se desarrolla nun conventu. La hora prevista ye les 23 hores y el preciu de 6 euros –de 4 pa los socios del Teatru Prendes–, abriéndose la venta d’entraes 60 minutos enantes de la función. Toles representaciones van repetir horariu y preciu.

Los otros estrenos previstos nesta vixésimocuarta edición del salón, hasta sumar siete –dos más que na anterior–, son ‘Cásasenos la neña’, de los xixoneses Rosario Trabanco, escrita por Manuel García Galano (vienres); ‘La allerana’, de la Compañía Asturiana de Comedias, con sede en Xixón, creada por Eladio Verde (sábadu); ‘Bailando baxo el orbayu’, de los xixoneses Traslluz, obra de Carmen Duarte (domingu); ‘Una muyer d’armes tomar’, de los uviedinos Chancios Asgaya, nacida de la pluma de Segis Meana (martes); ‘Paraíso fiscal’, del grupu de Llaranes Santa Bárbara, con firma de Carmen Campo Mier (miércoles 27), ‘Tu, yo y el vecín’, del Grupu de Teatru Asturianu Carbayín, tamién d’Oliva (vienres 29); y ‘El fantasma de Cabrales’, del grupu Xana de Perlora, escrita por Verde (domingu 31), ésta última un reestrenu. Completen la programación ‘El pasáu, el presente y el futuru’, del grupu Refaxu de Samartín del Rei Aurelio (mañana), tamién de Verde; ‘El troleru’, del grupu En Sin Reparu de Sebares, creada por Arsenio González (llunes); ‘La mala pata del alcalde’, del grupu El Horreo de Barcia, obra de Pedro Mario Herrera adaptada por Oliva (xueves 28); y ‘El cantar de los pipiolos’, representada y creada polos felguerinos Padre Coll (sábadu 30).

Los Aurora, el vienres 5 de setiembre

La instalación candasina tamién va ser sede, otru añu más, de los XII Premios Aurora Sánchez de Teatru Costumista Asturianu, que valoren el llabor d’estos grupos de teatru amateur que tanto faen disfrutar a los aficionaos. Nesta ocasión, el títulu del espectáculu d’humor qu’acompaña la entrega de gallardones lleva’l nome de ‘La gala siempre llama dos veces’, creada por Alain Fernández. La entrada pa presenciar los Aurora, que van tener llugar el vienres 5 a les 20 hores, ye de baldre.

Otra manera, al mesmu tiempu que’l XXIV Salón de Teatru Costumista Asturianu de Candás, en concreto del 25 al 29 d’agostu, va celebrase na villa el X Taller de Monologuismu Cómicu Asturianu, impartíu por Carlos Alba ‘Cellero’.