L’Sporting cai a puestos de descensu

La sexta derrota seguida fai que l’equipu xixonés caiga a puestos de descensu. Sicasí, el marcador foi mas contudente de lo qu'espeyó'l xuegu dambos equipos. Mientres que los madrileños tiraron de les individualidaes, los asturianos dominaron el xuegu, anque la falta de pegada y una defensa feble sentenciaron el partíu. Tres esta xornada l'Sporting queda con 33 puntos, a ún de la salvación.

L'Sporting ufrió otra cara nel Calderón frente a un Atlético que sacó'l partíu allantre tirando de tres xugadores que rescamplen pola so calidá: Agüero, Forlán y Simao. Y ye que los xixoneses nun-y perdieron el ritmu al partíu en nengún momentu. Sicasí, ora vez la feble defensa y la falta de pegada nel últimu remate condenaron al equipu a la perda de los tres puntos.

El partíu entamó equilibráu, colos locales dominando anque ensin muncho convecimientu. Poco hai destacable nos primeros minutos, hasta que nel 27 la mala suerte da-y al Atletico'l primer gol: un mal rechace de Neru cai nos pies de Forlán, que tira un trallazu que vuelve a pegar en Neru, esti desvia la trayectoria y acaba na portería de Cuéllar. L'Sporting siguió intentándolo, fue garrando'l dominiu nel centru del campu, pero un error na defensa diba costar el segundu gol enantes del descansu. Una paré ente Forlán y Simao acaba na rede local énte la incapacidá de la defensa asturiana.

La seguda parte entamó como acabó la primera. El Kun Agüero gana la partida a la defensa sportinguista y bate a Cuéllar de tiru cruzáu. Sicasí, la respuesta del Sporting llegó rápidamente. Tres una bona internada de Diego Castro pela banda izquierda, esti centra rasu al área pequeña un balón que Bilic namás que tien que tocar a puerta vacía. Con esti gol l'Sporting pasó a dominar dafechu'l partíu, que foi un monólugu asturianu hasta'l final, pero incapaz de rematar nos metros finales, fallando ocasiones clares como un rechace de Leo Franco que nengún xugador del Sporting ye quien a rematar, acabando nos pies de Lora, que cola posición ganada na frontal del área manda'l balón a la grada. A too ello sumóse que l'arbitru nun s'atrevió a señalar un penalti de Simao a Bilic tres emburrialu nel área.

En defintivia un Sporting qu'ufrió meyor cara, marcó un gol (llevaba dos partíos a cero) y que, pese a la derrota, la meyora nel xuegu fai que pueda afrontar con moderáu optimismu'l proximu partíu contra l'Athletic, un encuentru qu'hai que ganar si o si. La mala noticia ye que l'Sporting, pa mantenese, yá nun depende si mesmo. La próxima xornada va ser clave.

Ficha Técnica

Atlético de Madrid 3-Sporting de Xixón 1

Atlético de Madrid: Leo Franco; Heitinga, Perea, Ujfalusi, Antonio López (Pernía, m. 61); Maxi Rodríguez, Assuncao, Raúl García (Camacho, m. 69), Simao; Forlán (Banega, m. 80) y ''Kun'' Agüero.

Sporting de Xixón: Iván Cuéllar; Sastre, Iván Hernández, Neru, Canella (José Ángel, m. 46); Míchel, Camacho (Carmelo, m. 56); Pedro (Luis Morán, m. 75), Lora, Diego Castro; y Bilic.

Goles: 1-0, m. 27: Forlán. 2-0, m. 40: Simao. 3-0, m. 46: Agüero. 3-1, m. 47: Bilic.

Árbitru: Javier Turienzo Álvarez (Castellanu-lleonés). Espulsó a Simao, del Atlético de Madrid, por doble amariella (m. 84). Sacó tarxetes amarielles a los locales Raúl García (m. 19) y Assuncao (m. 62) y a los visitantes Camacho (m. 16), Sastre (m. 57) y Luis Morán (m. 90).