El númberu de falantes d’euskera aumentó en 325.000 persones nos últimos 25 años

El Gobiernu vascu ta acabante d’asoleyar el IV Mapa Sociollingüísticu, que recueye datos de 2006 y nel que se conseña que la llingua vasca tien un total de 863.000 falantes, una cifra que supón “el mayor númberu de falantes de tola so historia”, en palabres de la conseyera de Cultura en funciones, Miren Azkarate.

Según los datos recoyíos nesti estudiu, el 37,5% de los habitantes de la Comunidá Autónoma Vasca sabe euskera, lo que supón una xuba de 15,5 puntos respective a la situación nos últimos 25 años. A esto añádese qu’un 17,3% de los habitantes del País Vascu son billingües pasivos (entienden l’euskera, pero nun lo falen), mientres qu’un 45,2% namás sabe castellanu. Hai 25 años, yera un 60% de la población la que sólo sabía castellanu.

En total son 755.000 persones les capaces de falar vascu na Comunidá Autonóma Vasca, a les qu’hai que sumar los falantes de Navarra y del País Vascu francés, qu’ente dambos territorios sumen poco más de 100.000 falantes, lo que fai un total de 863.000 falantes. Per territorios, en Guipúzcoa son billingües el 53,3% de los sos habitantes, a lo qu’hai que sumar un 15,8 de billingües pasivos, mientres que n’Álava’l porcentaxe d’euskaldunes asitia nel 25% y en Vizcaya nel 31,3%.

El perfil de los nuevos falantes: más mozos y más urbanos

Si en 1981 el 31% de los falantes superaba los 65 años, la tendencia camudó dafechu y los datos espeyen qu’anguaño la mitá de los vascos menores de treinta años son billingües, y el porcentaxe duplícase ente quienes nun cumplieren entá los 20, por cuenta que’l 75%  de los menores de 15 años sabe euskera.

Tamién pue apreciase que la llingua vasca pasó de tar circunscrita mayoritariamente a les poblaciones pequeñes y medianes de les zones tradicionalmente vascófones a les ciudaes. Anguaño la mitá de la población billingüe vive nos grandes núcleos urbanos nos qu’habita’l 65% de la población vasca. Otru datu significativu ye que, anque siguen siendo mayoría los vascófonos de llingua materna vasca, el 44% de los euskaldunes tuvo como primera llingua’l castellanu, porcentaxe qu’algama’l 59% ente los menores de 35 años.

El datu menos positivu nel usu del vascu ye’l de so empléu nel ámbitu familiar, por cuenta que nun se rexistra nengún cambiu nos últimos años, manteniéndose nun 21,4%. Según el Gobiernu vascu la razón ye que “gran parte de los billingües actuales aprendieron la llingua fuera de casa, a diferencia de lo qu’ocurría hai 25 años”.