El nuevu Festival Intercélticu promovíu pol Ayuntamientu d'Avilés va celebrase del 17 al 26 de xunetu

El conceyal de Cultura del Conceyu d'Avilés, Román Antonio Álvarez, confirmó en rueda prensa que'l nuevu intercélticu promovíu pol Ayuntamientu, que se denomina 'La fiesta comarcal del branu: festival intercélticu', va tener llugar en tola comarca ente'l 17 y el 26 de xunetu. "La gran novedá ye qu'esti festival va ser de toos y va incluyise la innovación", dixo.

   L'edil de cultura realizó estes declaraciones nel marcu d'una rueda prensa onde se desvelaron les primeres pincelaes d'esti nuevu festival, dao que la presentación oficial va ser dientro un mes. Esti festival va tar xestionáu pola federación d'Asociaciones Xuntanza, que conformen cinco entidaes folclóriques y culturales de la comarca d'Avilés.

   Na declaración de prensa, tuvieron presentes amás del edil de Cultura, el presidenete de Xuntanza, Matía Martínez, que va ser el director de festival, el vicepresidente de Xuntanza, Federico Palacios, que va ser el coordinador d'eventos, y el xerente de Festexos, Rubén Arias, que va ser el coordinador xeneral del festival.

   Demientres los diez años anteriores foi'l grupu Esbardu'l que creó y organizó esti festival, pero'l nuevu promovíu pol Ayuntamientu va tener munches diferencies col anterior. "Van participar los grupps d'Avilés y comarca, va haber total tresparencia na xestión, va trabayase en rede y van unise la tradición celta cola innovación, porque tamos nel sieglu XXI", apuntó Román.

   L'edil de Cultura algamó'l so propósitu d'organizar directamente l'Intercélticu y na declaración tenía clara la premisa d'esta primer edición. "Los siguidores del Intercélticu van notar una amplitú mayor, dao que'l festival s'abre con coses diferentes, al contar con espacios nuevos, con nueves actividaes, nuevos grupos y, en definitiva, nuevos protagonistes", señaló.

   Pela so parte, el director del festival, Matías Martínez, mostró'l so arguyu por dirixir l'eventu, y dexó claru l'espíritu del mesmu. "Falamos del nuesu festival, porque ye de toos, dao que preparamos un organigrama nel que cada grupu va tener la so función asignada", señaló.

   Nesti festival intercélticu, nun van faltar grupos internacionales, y la nueva direición quier implicar a instituciones como la Escuela d'Idiomes. "Pretendemos que con cada grupu estranxeru tean dos persones, casi les 24 hores del día, que dominen l'inglés y el francés, pa que los de fuera se sientan como en casa", señaló Palacios.