El paru aumentó en 9.600 persones nel primer trimestre del 2009 n'Asturies

El paru aumentó nel primer trimestre del añu nel 2009 nel Principáu d'Asturies en 9.600 persones, lo que supón un aumentu del 19,57 por cientu en rellación col trimestre anterior, colo que'l númberu total de desemplegaos s'asitió en 58.500 persones, lo que representa una tasa de paru del 12,1 por cientu, según los datos de la Encuesta de Población Activa (EPA) fechos públicos pol Institutu Nacional d'Estadística (INE).

   Nos últimos doce meses, el desemplegu aumentó en 17.200 persones (+41,80 por cientu), mientres que'l númberu d'ocupaos baxó en 15.900 persones, lo que supón una cayida porcentual del 3,57 por cientu en rellación col mesmu trimestre del añu anterior.

   De xineru a marzu la cifra d'ocupaos baxó en 14.200 persones en rellación col trimestre anterior, lo que supón una cayida del 3,21 por cientu, de manera que la cifra total d'ocupaos algama les 428.600 persones.

   Pela so parte, el númberu d'activos baxó en 4.700 persones nel primer trimestre del 2009, -0,95 por cientu-, colo que la población activa quedó constituyida por 487.100 persones. Nos últimos doce meses el volume d'activos aumentó en 1.400 persones, lo que representa un incrementu del 0,29 por cientu en rellación al trimestre precedente.

   La tasa de paru masculín s'asitió nel 10,92 por cientu nel primer trimestre del 2009 n'Asturies, mui perbaxo de la rexistrada nel conxuntu del Estáu (16,86 por cientu). Mientres que'l paru ente les muyeres  asturianes (13,32 por cientu), ye mui inferior a la media nacional (18,01 por cientu).

   No que cinca a la tasa d'actividá, algamó'l 52,11 por cientu, ocho décimes perbaxo de la media estatal, que ye del 60,15 por cientu.

   El nuesu país tuvo nel primer trimestre del 2009 la cuarta tasa de paru menor del Estáu, con un 12,01 por cientu.